滙豐銀行喺一月三十一日宣佈委任鄭海泉為滙豐控股（滙控）執行董事，於二月一日生效，於是鄭海泉成為滙豐創辦一百四十三年來第一位華人僱員成為銀行最高層董事會成員。究其實，鄭海泉喺二○○五年五月接替艾爾敦出任滙豐亞太區主席之時，並未接收艾爾敦之滙控執行董事職銜，要等足咗近三年先至進入最高層董事局，未免等得太耐，按好多香港華人賓架嘅意見，鄭海泉到今日先至做滙控執董，係longoverdue。此外，有好多人冇留意到嘅，就係滙豐以前在港註冊之時，滙豐大班皆是馬會董事，而且係馬會主席㖭，例如桑達士，沙雅、沈弼、蒲偉士。滙豐遷冊倫敦之後，蒲偉士先至離開馬會，然後龐約翰住在倫敦，於是亞太區主席艾爾敦根據傳統，因滙豐之名，入馬會董事局。直至現在，艾爾敦退休後仍然續任。咁樣，鄭海泉要等到幾時先至可以替滙豐在馬會董事局取回一個席位呢，又係longoverdue。
滙控自八十年代中收控英國米特蘭銀行與美國海豐銀行之後，素來採取三腳櫈政策，以亞洲為發源基地，歐洲、美國為擴充地盤，龐約翰做滙控主席時，收購埋美國HouseholdInternational，希望增加利潤，點知今次因次按危機，在美國幾乎一鋪清袋，歐洲方面就無大增長空間，於是三腳櫈之中，美國令美洲櫈跛咗半截，歐洲櫈就腳軟，全靠亞太區及中國呢張櫈頂住，鄭海泉管轄嘅區域成為整個滙控最重要、不可或缺嘅利潤來源。不時進逼滙控主席葛霖嘅美國投資者EricKnight就力主滙控將全部注意力放在亞洲。在如此大形勢之下，滙控如果仲唔提升鄭海泉入滙控董事局，未免昧於形勢。葛霖在滙控新聞稿話鄭海泉以亞太區主席身份執掌十九個國家和地區的業務，鞏固了滙控作為亞洲首屈一指的國際銀行的地位。葛霖講得好啱啫。滙控通告指鄭大班現持有二十四萬一千四百六十九股，再加埋獎勵股與儲蓄優先認股，持股總數係652,561，鄭大班退休後可以印印腳。