驛馬星動，啱啱又去完台北返嚟，誠品仍然咁好行；牛肉麵都係咁好食；仲第一次去太和殿食火鍋，嗰位嬸嬸好認真示範點樣整至好食，係老式台灣人嘅親切；仲有同Karen、Cynthia大江南北咁吹水…
不過，喺台北撞口撞面都係香港人，台灣觀光局老友話舊年訪台港澳旅客佔整體13.22%，有成50萬人次，比對上年多咗一成三，日均消費約1,200蚊。
老友話觀光局今年推出四季旅遊主題，分別為「花樣春頌」、「悠遊夏趣」、「楓采秋韻」及「浪漫冬戀」，每季各有禮送，包括春季送台北捷運1日券、高雄送愛河船票；夏季送觀光遊樂園門票；秋季送台灣名產；冬季送泡湯券。詳情可以問吓台灣觀光協會，電話25810933，網址 http://www.taiwan.net.tw。仲有，喺台北記得去Mr.Donut，綠茶紅豆味Donut，超正！
逢周一至周四刊出