送豬迎鼠，星俠先向讀者拜早年，祝大家鼠年股運亨通、身體健康、心想事成。
今日年卅晚，港股半日市，成交將更淡靜。昨日大市曾低見24504，不過午後淡友攻勢收斂，收報24808，跌223點，成交僅得850億元。
50日線失守宜沽
內地官方報章批評平安保險（2318）視股市為「提款機」，指計劃集資千億元人民幣，係大規模增發「圈錢」，沒考慮市場承受能力和中小投資者利益，兼打擊市場信心。一家上市公司的集資行為，竟會引發官方媒體高調為文批評，莫非是「中國特色」之一？換個角度看，港股都唔知有幾多股份當個市係「提款機」，雖或一樣有人罵，但多數係股評人，唔會成張報紙去鬧。
月前星俠曾建議讀者不妨將港鐵（066）伺機食糊。家陣再睇番隻股，50日線（29.16元）似有不俗支持，但10日線跌破20日線後，20日線亦出現耷頭，加上MACD仍然呈現熊差，如果再跌破50日線，今次真係要撇。