今日是年三十晚團年夜，大契李司棋、細契關菊英、大鮑夏雨和細鮑陳豪特於日前相約到灣仔團年，大擦鮑翅之餘，司棋姐更大搞爛gag，令陳豪和關菊英笑到幾乎噴飯。夏雨和司棋姐更叫關菊英年三十晚切勿冲凉，免將豬年好運冲走，新年流流認真大整蠱。撰文：戴彩煥
去年《溏心風暴》大收旺場，故無綫今年原班人馬再開拍《溏心風暴之家好月圓》，今次細鮑陳豪名正言順做大鮑夏雨和大契李司棋乖仔，而細契關菊英則由大鮑二奶變成大契胞妹，雖然劇中關係大兜亂，但眾人經過上次合作後已儼如一家人般熟絡，見面完全沒有隔膜。
懶理減肥食咗先
今日是年三十晚一家團圓的大日子，大細契和大細鮑亦趁日前未正式開工前一起到灣仔吃團年飯，雖然今次新劇中夏雨由賣鮑魚變成開餅舖，但日前團年，四人繼續狂擦鮑魚和雞煲翅，最搞笑的是夏雨本來一到場後便嚷着說減肥，結果一見滿桌美食，卒之還是忍不住口大快朵頤。夏雨邊擦邊說：「我噚日先至話要開始減肥，點知今日又超額，真係冇鬼用！」
食飯期間眾人大談過年習俗，關菊英揚言會買新內衣褲及睡衣過新年，而且更習慣年三十晚用碌柚葉冲凉，以便把過去一年不好的東西冲走，豈料司棋姐聞言即緊張萬分地阻止說：「你今年好好，唔好冲呀！」夏雨亦和應司棋姐說：「係囉，你今年咁好，冲晒去咪弊傢伙！」關菊英半信半疑的問道：「咁係咪即係連凉都唔好冲呀？」夏雨和司棋姐邊點頭邊笑說：「係！」陳豪雖然明知夏雨和司棋戲弄關菊英，奈何大人講嘢小朋友不准插嘴，故只好專心繼續大啖鮑魚好了。
「豬脷唔好放枕頭」
在即將開拍的《家好月圓》中，司棋姐除繼續發揮其精警金句外，更會大搞爛gag，食團年飯當天，司棋姐便小試牛刀一顯身手說：「過年可以擺個桔或者蘋果壓住封利是放喺枕頭度，代表大吉大利，平平安安，但就千祈唔好放條豬脷喺枕頭度呀！因為豬脷好肥膩，冇人會放喺枕頭上面囉！」司棋說罷竟全場鴉雀無聲，大家你眼望我眼的一時間不知如何反應，此時夏雨老實不客氣說：「真係好爛嘅爛gag！」大家才忍不住爆笑起來；一餐團年飯，充滿着開心歡樂氣氛，未食飽，已笑飽。
榮升視帝視后的陳豪和司棋姐，以及夏雨和關菊英，農曆新年將分別在工作中度過，齊齊賺個盤滿缽滿，其中夏雨會與關菊英到馬來西亞登台𢱑銀，夏雨笑說：「我只係掹大公仔（關菊英）車邊做嘉賓呃吓飯食咋！我又唔係歌星，邊度識唱歌吖！」司棋姐農曆年也會出席一些賀年活動，雖然女兒葉子青身在多倫多無暇返港陪她過年，但每年大年初一，子青也會打長途電話向司棋姐拜年問好，加上司棋姐身邊還有兩隻寶貝狗陪伴左右，單是為牠們打扮已忙個不亦樂乎，司棋姐說：「我會買新衫畀佢哋着，同佢哋扮靚靚，過年都會畀利是佢哋㗎！」司棋姐服侍如此周到，又難怪不少人說做狗好過做人。
陳豪預告派利是
說到陳豪就最架勢，廖碧兒被視為去年幫無綫賺錢最多的女藝人，而賺錢最多的男藝人，正是其緋聞男友陳豪，記者取笑他是無綫的金叵羅，陳豪即面紅紅否認道：「未攞獎之前都好多job做，一切都好順利，所以新年我會將我對大家嘅感激送出去，等大家都可以share我嘅好運！」言下之意即是派利是。言談間，陳豪還無意中透露身世：「我冇幾耐之前聽媽咪講，原來我係金豬嚟，真係金豬年出世㗎！」難怪豬年陳豪大豐收！
攝影：陳偉權
協力：黎敏茵
場地：陶源酒家
服裝提供：裕華國貨
豪嘆萬四蚊鮑魚宴
李司棋、夏雨、關菊英及陳豪四人日前在灣仔陶源酒家一嚐價值$13,880的豪門宴團年，共有10個菜式，各人均對菜式「招財進寶」讚不絕口，當然招牌雞煲翅也讓眾人吃得津津有味，而四人嘆鮑魚之前，老闆楊潤全更建議他們先飲啖楊桃檸檬汁漱口，以便更能嗒真鮑魚味道！
1.一團和氣（姬松茸炒黑豚肉）
2.如意吉祥（紫蓮素薈）
3.橫財就手（黑椒扣元蹄）
4.財源滾滾（千葉豆腐）
5.發財好市（蠔豉髮菜）
6.招財進寶（翠盞煎金蠔）
7.嘻哈大笑（咕嚕蝦球）
8.滿堂吉慶（金裝拼盤）
9.雞煲翅
10.蠔皇扣澳洲三頭鮑
話你知：大鮑賞巨鮑
團年飯後，還有餘慶，陶源酒家老闆全哥拿出他的家傳之寶──12両重超級巨鮑給夏雨和陳豪鑑賞。原來，《溏心風暴》中夏雨雖然擁有八隻兩頭鮑，但劇中鮑魚全是道具，大細鮑還未真正碰過一頭或兩頭鮑，又難怪當日二人見到這隻巨鮑時如此興奮，不停跟巨鮑拍照留念。至於這隻12両重亁鮑價值多少？全哥說：「呢隻鮑魚重過兩頭鮑，但又未到一頭，市值大概十幾萬，係早年一個朋友兩萬蚊讓畀我，𠵱家市面上莫講一頭鮑，連兩頭鮑都好少，所以呢隻鮑魚對我嚟講係無價寶，我唔會賣。平時我會擺喺雪櫃，耐唔耐攞出嚟曬吓，咁會保養得耐啲。」
