花旗股市前晚低收，銀行股走勢麻麻，拖低咗個市。
微軟收購雅虎單嘢炒咗一陣，跟住就好多問題走咗出嚟，雅虎唔想嫁，Google又唔想微軟同雅虎成親，加埋反壟斷法嘅規限，搞到呢單刁充滿變數，事實上微軟要搞掂呢單嘢仲要撲水，所以微軟嘅股價開始有啲壓力，而雅虎有個offer托住，股價應該唔會差得去邊，不過今次炒科技股併購可能掀唔起熱潮。
港股昨日跌番兩百幾點，不過成交好奀，今日半日市，個市仲會靜啲，按以往嘅經驗，如果昨晚美股冇乜唔妥，今日港股挾高收市嘅機會都幾大。
中鐵C輪1649：中鐵（390）昨收9.57元，股價跌咗成個月，呢幾日嘅反彈算幾有力，短線睇11.2元，可以買啲C輪1649「責年」，隻輪昨收28.5仙，槓桿率3.3倍（有效2.5倍）。
正股升上11.2元，1649會有四成半升幅，正股跌穿8.8元止蝕。