講到鼠年樓市走勢，市場似乎一致睇好，香港四大地產代理行當然更加落力鞭策前線，等佢哋趁農曆年假加把勁，咪放過任何一個想搭樓市順風車嘅買家，除咗利嘉閣初一、初二休息，另外三大代理行中原、美聯同香港置業一於年中無休，初一開市，不過，就未必開晒咁多間分店，通常會揀大型屋苑，好似鰂魚涌太古城、沙田第一城等，其次就係針對發展商新春無休嘅一手貨尾附近啲分行。
中原冧莊派利是冠軍
要班兄弟春節開工𢱑銀，最好嘅方法梗係用銀彈政策──開單利是，只要喺新正頭嗰幾日做成買賣，就可以額外𢭃多封利是，今年最豪爽嘅，同上年一樣都係中原，有成千銀，做到租單都有五嚿水。不過，同一個老竇嘅利嘉閣就「同人唔同命」，繼續冇開單利是，開工利是亦只得20蚊雞。
美聯同港置同上年一樣，初一、二做成一單買賣，會有380蚊利是，租務就有180蚊。港置執董李志成話呢兩個銀碼意頭好，最好班前線「長開長有」，名額同數量不設上限喎。
中原嘅開單利是雖然多，但人人有份嘅開工利是就唔係咁吸引，同上年一樣係50蚊，比美聯同港置嘅100銀少咗成半。
秘書嗰封一個月人工
咁行內大粒佬又點呢？可能好多人都知，中原老施從來唔會喺公司私下派利是，新入職嘅要小心嘞，新正頭見到施老闆可以慳番啖氣，因為講幾多句恭喜都冇「回報」。另外，早輪升正做美聯集團執行董事兼集團行政總裁嘅陳坤興，都預咗大出血，佢話準備咗兩三萬銀嚟派利是，每封由20到100蚊不等，各位新正頭見到佢醒目啲喇。
另外，華華同啲分行阿頭傾過，佢哋話每年都會預封大利是，畀分行個勞苦功高嘅秘書小姐，好市嗰陣，隨時幾千銀一封，近排個市咁掂，睇怕今年都有成個月人工咁滯嘞。
電郵：mailto:[email protected]