最近色情和桃色新聞特別多，除咗全城熱爆嘅陳冠希網上淫照事件，上市公司都關事。最新一期《壹週刊》訪問咗個內地女子，踢爆開源控股（1215）前行政總裁李宗揚涉嫌上網識女仔惹禍。
壹仔噚朝出街，上市公司夜晚就做嘢。開源控股晚上喺聯交所發出通告，指李宗揚即日辭去執行董事和行政總裁職務。通告話李宗揚「因從事其他業務而呈辭，與董事會並無意見分歧」，董事會仲「感謝李先生對集團之貢獻」，半粒字都無提到與任何報道有關。
開源控股前稱國新集團，舊年底改名，主要從事中國內地嘅供熱業務，舊年9月曾經公佈，計劃收購天津一間向樓宇供熱公司嘅部份股權，1月29日開始停牌，待公佈呢單交易嘅公布，停牌前股價收報0.232元。