早前國內A股風聲鶴唳，除了外圍股市因素以及雪災，相信主要「源頭」之一還是平安保險（2318）增發A股，集資過千億元，股民因此擔心若其他大市值股亦大量增發，供應大增時股市豈不大跌？
平保抽水難獲通過
股市跌得勁，股民損失慘重，未知是否因此國內監管部門怕出現社會問題，有意叫停平保集資。日前《人民日報》並高調發表署名文章，指如果上市公司不考慮市場承受能力及投資者利益，只向股市索取而不對股民回報，再融資很難獲市場認可。
文章又表示，平保今次集資恐成先例，把股市當成提款機，進行大規模增發、惡意圈錢，如果此風漸長，勢必會對股市的健康發展產生不利影響。事實上，平保是次集資根本無講明集資用途，而且公司手頭並不緊絀，唔使點名批評，建議本身都好難獲基金及散戶股東通過。
據外電稱，連先A後H上市的中鐵建以及紫金（2899）回歸A股計劃，也遭中證監叫停或拖延，反映內地當局對A股跌市怕得要死。這種另類調控，反映內地股市係真正政策市。下周三復市的國內A股，相信已是易升難跌，不妨買定啲紅籌國企過年，大紅籌可留意噚日講過嘅北控（392），細紅籌揀未點升過嘅航天控股（031）。
一線中資金融股經近期反彈，已由低位回升不少，不過二三線卻仍未受到市場注意，資金炒咗一線股先，二三線仲未到位。除高位大跌八九成嘅概念股仔之外，其實唔少實力股仍有尋寶機會，例如近期頻獲大股東增持及進行回購的信義玻璃（868）。
大摩睇信義見13.4元
大摩上月底發表報告，重申信義增持評級，目標價13.40元，其股價昨收報6.39元，有逾倍上升空間，聽落非常吸引。大摩相信強勁的需求以及供應增長放慢，提高了玻璃製造商的定價權，預期信義07至09年的複合年均純利增長為55%，對信義抱樂觀態度。