市場傳聞做鐵路生意嘅中鐵建計劃二月底招股，屯門李小姐推介中鐵（390）認為有影子股效應，另外，摩根士丹利1月中首次給予中鐵增持評級，目標價16.2元。
李小姐：過完農曆新年後短炒中鐵，希望兩個星期可以回本。我未入貨，但中鐵目標價會見11元。
何啓聰：中鐵有炒影子股概念。
李小姐：災後重建股呢個因素已經炒咗幾日，如果從影子股角度出發，投資策略又係點﹖
何啓聰：現階段先行炒影子股，似乎早咗啲，最好係中鐵建招股前短炒，中鐵建上市前就要沽貨獲利，唔好理中鐵建上市當天股價表現，要記住炒呢啲股要識得落車。
孫柏文：現階段中鐵建只有招股同埋上市日期，冇太多數據參考，要小心中港兩地春節期間，歐美股市仍如常運作，假設中鐵建屆時定價欠佳，影子股股價又要打折扣！
李小姐：中鐵同埋啲窩輪有冇得諗？
何啓聰：個市都係波動，加上長假在即，都係揸股票好過玩輪。
李小姐：我仲想講埋中交建（1800），佢雪災後重建股利好因素。但入市策略又係點？
何啓聰：中交建每次喺20蚊樓下吸納，幾乎未令粉絲失望，但24蚊目標價能唔能夠達到就有小小保留，理由係佢個股價喺近24蚊個位，剛好又有幾間大證券行唱好股價，可惜股價仍然上升乏力，所以我有啲保留，但目前股價（昨收21.25元），我諗有留意價值。
李小姐：入市價位應該係幾多﹖
何啓聰：20蚊邊可以考慮買。
盈富基金（2800）
博大陸股帶動港股
陳生：想推介盈富基金（2800），相信大陸初八啓市後會有唔錯表現，帶動埋港股，睇盈富兩個禮拜升8至10%。你哋點睇2月個市？
孫柏文：揸貨唔好揸過年，因為唔知美國仲有邊間銀行會出事，如果2月冇另一輪救市行動，當地銀行評級有可能會再被降低。
何啓聰：美國股市𠵱家都係跑輸緊，香港個市波動又咁大，盈富基金好難短炒，而且盈富基金多數都係啲阿婆買，恒指短期好難大升，就算升幅有千零點佢都只係升4、5%，我睇佢短期應該唔係好郁，短炒唔多值博。
-跑馬地陳生建議-
建議買入價：25元 目標價：-
止蝕價：- 時期：一個月
中材股份（1893）
災後重建揀中材
關公：今日想講吓隻中材股份（1893），揀佢都係睇好佢有災後重建概念，不過現價就高咗啲，比招股價6.2蚊高咗三、四成，7.5蚊就較合理，不過照睇10蚊都好大阻力。
何啓聰：我都同意關公睇法，中材上面真係好多蟹貨，同埋要留意內地賑災好多時，賣嘢出去都係用「賑災價」，概念係可以炒，但唔代表對佢盈利有幫助。睇埋走勢，今日去到9蚊就跌番落嚟，反映承接力真係麻麻。
孫柏文：我都認為玩𠵱類災後重建股要小心啲。仲有，我建議，買𠵱類股賺到錢不妨捐番啲賑災，貢獻吓國家。
-大埔關公建議-
建議買入價：7.5元 目標價：9.5元
止蝕價：6.8元 時期：半年
鞍鋼（347）
行業龍頭前景佳
李生：我想推介鞍鋼（347），一嚟佢係行業龍頭，二嚟佢啱啱簽咗個CDM項目，所以睇好佢盈利前景。
孫柏文：可唔可以解釋乜嘢係CDM項目？
李生：CDM即係清潔生產發展機制，好似話會有1.5億歐元收入。
何啓聰：簽CDM項目係鞍鋼母公司鞍鋼集團，唔係鞍鋼，國企好多時都分得好開，所以佢將來嘅收益未必撥入上市公司。睇番佢個圖表其實一浪低過一浪，16蚊入其實已經有壓力，短期睇20蚊會係重要阻力位。
孫柏文：有大行都擔心鞍鋼鐵礦沙成本上升可能影響到佢盈利，都係呢隻股嘅利淡因素。
-旺角李先生個案-
買入價：16元 目標價：21元
止蝕價：14元 時期：三個月
A50中國基金（2823）
補下跌裂口$22入貨
David：噚日（星期一）喺22蚊入咗A50中國基金（2823），呢隻ETF近排走勢靚番，仲補埋上個月22日個下跌裂口，啲分析話，今年繼續睇好亞洲同中國，年中又話會再炒奧運概念，近期內地股市已調整咗唔少，所以我覺得A50中國基金有機會上番舊年10月高位28蚊。
孫柏文：買呢隻股即係睇好內地A股，其實睇好、睇淡內地嘅分析員各半。
何啓聰：A50中國基金去番28蚊，即係話A股要再創新高，我就有啲保留，建議David將個目標價降番低，反而今年我較睇好H股，表現有機會較A股優勝。
-西環David個案-
買入價：22元 目標價：28元
止蝕價：20元 時期：半年
利福國際（1212）
行吓崇光至決定買
黃小姐：有個朋友叫我買利福國際（1212），話人哋跌市利福就升，唔知買唔買好？
何啓聰：呢隻股我曾經都持有過一段時間，當年因為見到佢管理層有改變而買入，利福喺上海有久光百貨，不過要留意𠵱家股價已經升咗好多。
孫柏文：我05年去過呢間公司嘅分析員會議，都覺得間公司幾好，不過想問黃小姐有冇去過Sogo行過？
黃小姐：冇喎。
孫柏文：崇光由利福持有。其實如果你想買呢類型嘅零售股，應該要出去行吓，感受一吓氣氛先做決定。
