近日疑似藝人淫照在網上流傳的風波越鬧越大，主角陳冠希遠走美國避鋒頭，牽涉其中的張栢芝和鍾欣桐（阿嬌）等至今仍未露面。近日有傳謝霆鋒因此事而發難，與太太栢芝鬧離婚，身為奶奶的狄波拉昨日力撐新抱，表示每個家庭歷經幾許風雨，又謂若追問栢芝淫照的真偽，有辱她為人奶奶的身份，據知拉姑將到黃大仙趕插大年初一頭炷香，又會到泰國拜四面佛求心安。至於阿嬌舊緋聞男友麥浚龍（Juno）則怒火填胸，怒轟拍攝者才是元凶，是渣滓中的渣滓。
被捲入網上疑似藝人淫照風波的張栢芝、鍾欣桐和陳文媛，自事件傳出後四人至今均未現身，日前有傳謝霆鋒與太太栢芝吵架，一度扯火嗌離婚，更有報道指奶奶狄波拉為此事發癲，雖然過去屢傳拉姑與栢芝不和，但今次她卻表態支持栢芝到底。
初一出動
搶插頭炷香祈福
據知拉姑大年初一凌晨將到黃大仙趕插頭炷香，祈求來年平安順利；同時每年都會到泰國拜四面佛的她，新春期間也會赴泰求神。昨日拉姑接受商台電話訪問，正式開腔回應疑似栢芝的淫照風波，問拉姑有否看過有關的淫照報道？她說：「對唔住，我覺得如果以我係家人，我只有支持啫，我平時都唔睇雜誌同報紙，我到𠵱家都冇睇過。」
對於有傳栢芝和霆鋒離婚，拉姑說：「話之嘛，如果做到香港人再信啲咁嘅嘢，我諗佢哋啲IQ同EQ都好低。」可有擔心霆鋒？拉姑說：「嗱，乜嘢叫做放手？我就今年08年學識，喂，佢成咗家咯，幾多家庭幾許風雨，回頭都係要佢哋牽住手過每一關嘛。」問到拉姑有何方法度過這關？她說：「我咪以靜制動囉，你係奶奶嘛，任何夫婦都應該離遠啲睇。」
拉姑又表示沒與前夫謝賢討論此事，她說：「如果逢係屋企人有事，連自己屋企人都會打去問係咪咁，喂，你有辱我自己做奶奶同阿媽嘅身份啫！我唔會做呢啲嘢嘅，如果我咁做就唔係智者。」
問拉姑有否了解事件來龍去脈，她說：「如果我𠵱家答你，就係去回應呢件事，我唔答、我唔應，我係家人，就係做番家人嘅嘢，但係我未知道成件事係乜嘢，我就不聞不問，繼續過年，繼續辦年貨。」
有傳Edison曾致電向拉姑道歉，她聞言即說：「吓？我咁大個女都未同過Edison通過電話。」問拉姑對Edison印象如何？她說：「我唔會反應，我個個都好人。」對於有消息指拉姑漏夜致電質問栢芝，她說：「佢邊隻耳仔邊隻眼睛睇到呢？我希望大眾畀啲時間畀成件事去消化，香港好容易下個禮拜又有第二單，冇人會記得㗎啦。」
Juno怒罵
「係渣滓中嘅渣滓」
提到拉姑被指當街發癲罵人，她平靜地說：「唔係發癲，係俾人迫到發癲啫，佢哋（記者）又拎埋電腦、報紙、雜誌嚟，咁我話唔想睇，佢哋質落你塊面到畀你睇，咁啲火就嚟，我有人權㗎嘛！」
此外，阿嬌緋聞男友麥浚龍昨日出席新城活動時說：「有份上載嘅人係壞心腸，但我覺得影嗰個人先係元凶，所做係極度自卑行為，損人不利己，簡直係渣滓，我好討厭呢啲嘢，嗰個人係渣滓中嘅渣滓，好唔光彩。」問Juno是否認為有人要為此事受到教訓？他語帶激動說：「影同上載嘅人搞呢啲嘢，當然應該受到懲罰。」
採訪、攝影：魯萍
娛樂資料庫：婆媳關係變幻莫測
謝霆鋒06年瞞着家人秘密與張栢芝結婚，令母親狄波拉痛心疾首，事後還公開表態認仔不認新抱。至06年11月栢芝主動在法國餐廳Amigo擺和頭酒，席間狂送LV和Prada等名牌予拉姑，離開時拉姑風趣地表示「條氣順晒」，自此婆媳關係轉好，經常煲電話粥，拉姑還傳授御夫術給栢芝。去年8月栢芝為霆鋒誕下兒子謝振軒，拉姑到醫院探望她時笑容滿面。去年11月雖然有報道指狄波拉不滿栢芝不餵人奶，但她即時接受訪問盛讚栢芝是好媳婦。
日韓廣泛報道淫照新聞
近日的疑似藝人淫照風波不但震撼兩岸三地，就連日韓兩地傳媒及路透社也爭相報道。日本傳媒關心此新聞，是因陳冠希曾演出《無間道》系列電影，加上他與當地不少潮界設計師熟稔，令他在當地頗具有知名度；至於栢芝因主演韓片《白蘭》，也令淫照風波在當地受到關注。前日警方拘捕一名涉嫌發佈淫照的29歲男子及搜查電腦公司，日韓兩地新聞網也有跟進報道相關新聞。
