臨近新年，古天樂和陳慧琳（Kelly）兩位大忙人都抽空去選購年花和過年食品，古仔與母親去郊區買盆桔，再買海味，逗得媽咪好開心；喜歡插花的Kelly日前則直闖人頭湧湧的旺角花墟買花。
-古天樂勿買桃花-
古天樂很重視一年一度的農曆新年，所以無論工作多忙，都會抽時間幫母親在家大掃除和辦年貨。日前他不用拍戲，就做孝順仔陪母親到清水灣選購年花。古仔08年開始會開創時裝生意，為了可以一本萬利，原本他想買棵桃花回家，但母親告訴他，若買了一棵開得不好的桃花反而不吉利，所以最後放棄了。
掃4000元年貨
記者問古仔不想買棵桃花來行桃花運嗎？他笑說：「今年工作好忙，有桃花運我怕自己都冇時間應付，所以都係咪搞啦，緣份呢啲，要嚟自然會嚟，唔使咁刻意。」最後古媽媽訂了年桔與牡丹花。兩母子買完年花又駕車到了九龍城的海味店買過年食品，老闆看見大明星光顧，立刻熱情介紹各種賀年食品，古媽媽選購了日本亁瑤柱、冬菇、海參和鮑魚等應節食品，而古仔就買了過年糖果如蓮子、蓮藕和花生糖等，他倆在店內逗留約半小時，埋單計數共花了4,000多元，不過古仔完全不覺肉痛。
在新年期間，古仔有七、八天假期，但他沒計劃出埠，他說：「忙足一年，真係唔係有太多時間同屋企人相處，所以難得新年有咁多假期，我想留番喺香港陪吓父母，其實過年我都好忙，因為屋企過年拜神要擇吉時，而且唔係拜一日就得，要拜兩日，大年初一、二又要陪媽咪去親戚屋企拜年，又要陪老爸去放生祈福，新年我都唔係好得閒。」
採訪：LoumieChan
攝影：RickyIp
場地提供：樂天花園、好東西
-陳慧琳閨房飄香-
陳慧琳在07年忙了整年，新年期間經理人公司給她四天假期，日前她趁有空檔專程到旺角花墟選購各種賀年鮮花，原來每年春節她都會親自佈置家居，雖然她是獨居，但她好注重過節氣氛，所以她認為過年總少不了擺設年花。
靚女買花着數
雖然臨近過年，花墟人頭湧湧，但Kelly完全不怕人多，記者見她在幾間花檔看到不同顏色的賀年鮮花時，表現得十分雀躍，而檔主見靚女來買花，特別高興，不但詳細介紹各種年花的意頭，還特別替她揀選又平又靚的年花，Kelly最後買了五代同堂、水仙和蘭花等。新春期間，她會在家開派對慶祝，邀請家人與舊同學等一齊賀年，而大年初一，她會向父母拜年，𢭃大利是。
問Kelly何時嫁人派利是？她笑說：「外間成日傳我今年會結婚收山，我諗鼠年仲未有結婚呢個打算，就算嫁人，我都唔會全退，因為𠵱家我仲好有事業心做嘢，感情事最好先放低，我同男友已經有默契。」
即將入鼠年，Kelly期望可以有一個新的開始，她說：「07年最大收穫是自己終於對演戲開竅，以前做戲因為唔係咁明演戲竅門，好多時係人到靈魂冇到，但跟導師學習演戲後，我終於可以有所領會，好似我演《江山美人》呢部戲時，自己開始知道點樣投入角色，呢位外籍導師，真係幫助我好大。我好希望大家睇呢部戲時，可以發現我同以前有啲唔同。」
籌備6月個唱
因為掌握到如何去揣摸一個角色，如今Kelly開始對演戲產生了濃厚興趣，所以拍完《江》片後，她立刻催促經理人鍾珍再替她度身訂做角色，Kelly表示：「我𠵱家最期待再拍戲，不過最重要都係睇有冇好劇本，我絕對唔會濫拍。踏入08年除咗拍戲之外，6月我仲會開個唱，所以個唱前，我都要有足夠時間做籌備。」
採訪：LoumieChan
攝影：EdwardChou
場地提供：國泰園藝