大埔關公上星期推介嘅中國人壽（2628）、建設銀行（939）同埋隻財險（2328），噚日走勢強勁。佢再打嚟推介隻中交建（1800），認為基建股有雪災重建概念，掂，有得諗。
關公：大陸雪災之後好多建設要做番，加埋之前手上嘅項目，仲有奧運嘅基建，照計應該有得諗吓，我睇有機會去番24蚊。
黃敏碩：睇番中交建，𠵱家喺20天線附近，貼近大市走勢，上個月下旬大跌市之後，好多股份都有裂口要補，中交建係其中一隻有力補番裂口嘅股份，上望可以先睇吓100天線嘅21.2蚊水平。
孫柏文：我都好同意關公嘅意見，大陸家陣喺公路度係咁灑鹽，咁樣對公路嘅破壞力好大，基本上美國都唔用𠵱個方法融雪，因為公路之後嘅維修成本好大。大陸係咁灑鹽，我諗中交建淨係搵重建公路𠵱條水，都應該賺唔少。
關公：仲有係佢哋用埋坦克車鏟雪，對公路破壞都好大。碩哥！其實上番24蚊有冇難度？
黃敏碩：如果佢貼住上，𠵱家距離24蚊仲有成3蚊水位，條件其實有，不過可能係講梗嚟緊第二季，短期都係先睇番22至23蚊上落。
-大埔關公建議-
建議買入價：$20.9 目標價：$24
止蝕價：$18.5 時期：一年
中國建築（3311）
唔好畀個名呃
David：我都好認同基建股前景，不過中交建升咗咁多，真係唔平，所以今次推介隻較落後嘅基建股中國建築（3311），𠵱隻股唔係局限中國基建概念，佢喺其他亞洲國家攞到唔少定單，好似中東、印度咁，我覺得有機會上番16蚊。
黃敏碩：雖然佢叫中國建築，但係佢有成45%未完成定單喺香港，千祈唔好畀佢個名呃咗！不過睇番佢嘅業務同技術走勢唔錯，唯一唔好就係size細啲。
孫柏文：中國建築PE有30倍，唔算平，不過好在佢有大陸背景，唔似其他上咗市嘅建築股咁亂抽水、玩財技！
洛陽鉬業（3993）
股價走勢麻麻
Ben：我想推介洛陽鉬業（3993），噚日喺9.67蚊入咗，不過你哋話基建同內需股好啲，資源股又點睇？
孫柏文：睇圖表股價已經反映咗市場對鉬嘅需求，鉬始終係一種好high-end（高端）嘅純工業元素。
黃敏碩：以競爭力嚟講，佢嘅鉬儲存量係全國最大，而且黃金存量亦都增加緊，呢啲對洛鉬都係正面嘅，奈何內地呢方面嘅工業情況放緩緊，需求亦無之前咁多，所以股價走勢非常之曳，一浪低於一浪，暫時佢嘅值博率都比較低。
-北角Ben個案-
買入價：$9.67 目標價：$12
止蝕價：$8 時期：三個月
阿里巴巴（1688）
借微軟吸新客
李先生：我想問吓隻阿里巴巴（1688），因為微軟收購雅虎，噚日科網股走勢都幾好。
孫柏文：今次好彩係微軟收購雅虎，如果係一啲私募基金收購雅虎，雅虎手頭上嘅阿里巴巴股票必定成為第一被沽出嚟資產。
黃敏碩：𠵱家個關鍵係，阿里巴巴股價已經預先反映微軟收購雅虎所出現嘅溢價，如果微軟入咗股，可以想像有一個協同效應，有機會借微軟嘅connection引入新客戶。不過，我覺得如果要考慮買科網股嘅話，可以諗吓隻騰訊（700），因為騰訊變數比較少啲。
-旺角李生個案-
買入價：$20.35 目標價：$27
止蝕價：$18 時期：兩個月
李寧（2331）
一回即買等上
張先生：想講吓內需概念，所以揀李寧（2331），早排跌咗咁多，見噚日開始反彈，加埋佢有奧運概念，可以等佢回番少少喺23蚊再入。
孫柏文：由舊年年中一直吹奧運概念，𠵱隻李寧到𠵱家都升咗唔少，由15蚊樓下升到上30蚊。
黃敏碩：李寧網絡多，有自己品牌，係一條龍服務，不過李寧噚日升咗咁多，要入都應該等等先，23蚊個入市價ok嘅，250天平均線喺21蚊個位，上望可以睇返28蚊。
孫柏文：不過要小心奧運概念都炒得七七八八，而且佢PE成80幾倍。
-九龍灣張生建議-
建議買入價：$23 目標價：$26
止蝕價：- 時期：短炒
首都機場（694）
走勢靚追入坐艇
黃小姐：我炒咗股票一兩年，10蚊買咗北京首都機場（694），因為見佢以前走勢好靚。
黃敏碩：市場覺得佢同母公司買資產作價做得唔係咁好，不過未來第三條跑道同埋新嘅客運大樓投入服務之後，佢嘅客運人次可以由3000萬增加到7000萬，收益可以顯著增加，暫時先守一守，隻股基本條件唔差。
黃小姐：我見花旗調低佢目標價，咁佢係咪會一路跌呀？
孫柏文：長遠嚟講首都機場係好好㗎，不過每一間國企都有一個叫做注資概念嘅溢價喺裏面，要留意呢啲溢價有可能會幻滅。
-屯門黃小姐個案-
買入價：$10 目標價：-
止蝕價：- 時期：一星期