澳門啲新型酒店開業後，果然大舉拓展娛樂表演事業，以拉斯維加斯方式，邀請著名國際歌星到澳門賭場演出。此招一出，香港都幾難捱，因為人家賭場辦事一條龍，第一有場地，第二有美國娛樂圈關係網，第三，佢哋辦表演，如項莊舞劍，志在沛公，以歌星吸引大量觀眾到賭場，聽歌前、聽歌後，總有人要入賭場碰吓運氣，一定留低多少，故此每場表演未必需要百分百自負盈虧。
香港辦同類演唱會就慘矣，一來演出場地少，二來場租貴，三來要靠門券收入，冇賭場補貼，你話點同澳門競爭呢？嗱，《南華早報》喺一月二十八日報道，幾位知名歌星，如Beyonce、ThePussycatDolls、TheBlackEyedPeas已在澳門舉行演唱會，根本唔嚟香港。「威尼斯人」酒店嘅表演場地有一萬五千座位，香港會展中心Hall3係歌星表演場所，座位削減到五千，邊有得比呀。農曆年間，ThePolice會到澳門演唱，觀眾從何而來？咪係從香港過去捧場嘅囉。
如此說來，香港以後會唔會輸晒？老友記樂仕話唔會喎，樂仕話澳門係有優勢，但觀眾靠香港客，如非周末，未必有足夠香港客去聽，畢竟香港仍有方便之處。樂仕與「威尼斯人」相比，如小貓撼大象，不過小貓經驗豐富，走位靈活，唔會畀大象踩死，佢嘅國際網絡不輸蝕於任何人，已經辦妥咗有世界三大高音之稱嘅杜鳴高（PlacidoDomingo）來港表演，在三月一日星期六晚八時正於機場亞洲國際博覽館舉行，門券由最便宜五百八十元至最貴嘅三千八百八十元。收到咁貴，有冇人睇呀？樂仕話：「定啲嚟，早前你都寫過成班賓架夾band玩到興高彩烈啦，香港有好多消費能力高嘅歌迷，自己鍾意唱，又鍾意聽名家唱，何況杜鳴高雖然有六十七歲，但能夠保持高水準，呢次又帶埋一位美麗女高音與佢合唱，我夠膽擔保你哋會聽出耳油。」講得咁肯定？欲知樂仕是否吹牛，到時入場一聽便知。左丁山有時覺得香港嘅市場導向好正，你話澳門大賭場搞表演咩，香港就有民間小本經營，不需政府津貼嘅WolfmanJack（樂仕間公司）負隅頑抗，年年有貨交。歌藝專業如果一定要政府撥款津貼，先至可以生存嘅話，離敗亡之期不遠矣。