同事Joe姐坐完豪華郵輪返嚟，猛咁同我講佢嘅所見所聞。噚日佢講開喺新加坡上岸玩嘅時候，見到喺下個月先開幕嘅摩天輪，打算下次再去新加坡嘅時候同男友一齊坐咁話。
個摩天輪又係幾靚嘅，高成165公尺，幾乎睇晒新加坡主要景色。仲有好多唔同種類嘅門票選擇，最普通嘅成人入場門票29.5坡紙（約163港元），如果唔想排隊可買52蚊（約286港元）嘅門票，最盞鬼嘅係用69蚊（約380港元）買張唔使排隊，又可以攞住杯雞尾酒坐摩天輪嘅門票。想私人包廂搞Party嘅話，就要畀1,000蚊坡紙起（5,500港元），可坐足28人！
但Joe姐話，新加坡做緊聖淘沙綜合娛樂城、世界一級方程式場地等大型工程，搞到周圍個景觀麻麻哋。佢話坐花柏山空中纜車去聖淘沙嘅時候，望落去四圍都沙塵滾滾，最好唔好咁心急去坐摩天輪住喎。Joe姐又呻架纜車殘殘哋，約13蚊坡紙（72港元）坐得10分鐘，不坐也罷！
逢周一至周四刊出