香港人除咗搵錢叻，捐錢賑災一樣掂，內地十年一遇嘅雪災，經過香港紅十字會呼籲後，全港大小企業都即刻有錢出錢、有力出力。但疏爽程度就唔夠內地企業，單係中海油（2883）就捐出3200萬人仔，比起07年中期賺145.5億人仔，只不過佔其0.2%左右。
滙豐帶頭捐100萬人仔
本港銀行界一哥滙豐噚日帶頭捐100萬人仔賑災，滙豐執行董事王冬勝前排去過湖北，話親眼見到雪災嘅禍害幾咁大，好多居民無家可歸，相信湖南情況更嚴峻，所以紅十字會搵佢幫手絕冇sayno，噚日將支票交畀紅十字會副主席林胡秀霞。
滙豐除咗捐錢之外，仲開個戶口畀本港同內地員工捐款。阿媽帶頭，阿仔恒生（011）隨即行動，捐咗50萬港銀。
香港人咁熱心，慷慨解囊嘅又點止兩間機構，港鐵（066）都捐100萬──不過係港銀，捐款亦都交畀紅十字會買禦寒衣物。
另外，信興集團唔知喺邊度收到風，知道中國扶貧基金會嘅代表噚日到港，接受內地運動服裝商特步國際同摩根大通嘅羽絨捐贈，即刻透過「信興教育及慈善基金」捐出55萬港銀。
中聯辦收錢唔手軟
香港總商會同中華廠商會都各籌得捐款，總商會捐50萬港銀畀中聯辦救災，由於主席蔣麗莉被廉署起訴後，一直放緊假，所以由包立賢呢位署理主席，帶埋總裁方志偉負責移交支票。
至於廠商會暫時籌到80萬港銀，今日捐畀中聯辦。負責收捐款嘅中聯辦副主任黎桂康呢兩日好頻撲，不過人出錢你出力，都係為賑災啫，最緊要啲錢真係用到喺災民身上。
電郵：mailto:[email protected]
昨日本地捐款機構
機構：滙豐銀行 捐款：100萬人仔
機構：港鐵公司（066） 捐款：100萬港銀
機構：中華廠商會 捐款：80萬港銀
機構：信興教育及慈善基金 捐款：55萬港銀
機構：恒生銀行（011）、香港總商會 捐款：50萬港銀
內地機構送贈物資
機構：中海油 價值（人民幣）：3200萬
機構：旺旺集團 價值（人民幣）：715萬
機構：中頂新國際集團 價值（人民幣）：60萬
機構：特步國際+摩根大通 價值（人民幣）：200萬
機構：統一集團 價值（人民幣）：超過50萬
內地捐款總值：＞4225萬（人民幣）