相士話：近日在網上流傳疑似陳冠希（Edison）及一眾女星的淫照，掀起風波連場，牽涉其中的幾位主角包括Edison、鍾欣桐、謝霆鋒及張栢芝等生肖均屬猴，可謂相當湊巧。適逢昨日立春，記者特別致電堪輿學家麥玲玲、蘇民峰及吳佩孚，了解受淫照風暴影響的藝人，來年運程以及能否化解這場災劫。麥玲玲直指Edison行正衰運，除非結婚冲喜，否則應保持低調。蘇民峰則指阿嬌豬年太歲相害，「係會煩少少」。 採訪：李全
陳冠希桃花繼續開
麥玲玲指去年早已預測到陳冠希會有此一劫：「佢行嘅運係屬天合地合，60年先有一次，啲運好衰，可以話係成世人今年最差，分分鐘可以由有變冇。總之起碼要等到8、9月佢先可以慢慢pickup番。」麥玲玲又謂除非Edison結婚冲喜，否則應保持低調。
蘇民峰則指屬猴的Edison，豬年太歲相穿，所以是非多，要到新曆5月6日至豬年結束，鼠年暫時未有突破，他說：「陳冠希一生人有兩個個人高峯運，係15至20歲同25至30歲，07至09年運程麻麻，要到12、13先會好。鼠年桃花唔係特別重，喺06、07年比較重，姻緣都係呢兩年，08年感情穩定，唔係官非年。事業方面利個人創作。」吳佩孚表示Edison明年會繼續犯桃花：「佢桃花重，呢單嘢都幾麻煩，事業會大受影響，盡可能都少啲喺香港出現。」
鍾欣桐感情仍空虛
麥玲玲指阿嬌運勢比陳冠希好得多：「阿嬌嘅運唔算太差，係會煩少少，因為佢條命太凍，冬天出世嘅人行水運係會差啲，但過咗呢關就會好，如果多啲去東南亞地方玩就更好。」她預料阿嬌會於農曆新年後復工，而且運勢絕不會因為淫照風波而大跌，只是感情方面仍是落空：「佢嘅命格係屬於比較任性少少，好難有長遠發展。」
蘇民峰則指屬猴的阿嬌豬年太歲相穿，07年是非特別多，他說：「佢25至35歲行大運，08、09年有發展機會，今年事業易有突破，感情OK。豬年佢太歲相害，係會煩少少，新曆5月6號豬年結束就會好。」吳佩孚表示鍾欣桐08年事業會走下坡，Twins也很大機會拆夥。
張栢芝兒子擋三災
最近不少傳言指栢芝因為淫照事件與霆鋒鬧離婚，又與奶奶狄波拉不和，日前更傳出懷孕消息，麥玲玲則大派定心丸說：「佢哋兩個冇問題，出年仲可以添丁㖭！」
蘇民峰也認為栢芝與霆鋒的感情沒有變化，他指生於夏天的栢芝屬火，06、07年是個人高峯，07年冲父母，不過一喜擋三災，他說：「栢芝生咗BB（謝振軒Lucas）就化解咗之前嘅影響；感情方面，佢08、09年冇乜變化，係思想學習投資年，宜進修，如果唔係可能會多嘢諗。07年屬猴嘅佢因為太歲相害是非係多啲。」吳佩孚則說：「嗰時我都預計栢芝同霆鋒呢段婚姻麻麻哋，結果08年真係出事。」
陳文媛中60年伏刑
有指陳文媛因淫照風暴與金融界財俊男友金紫耀的婚事處於膠着狀態，麥玲玲說：「佢上半年係有啲波折嘅，不過應該結得成婚㗎！」
蘇民峰則指陳文媛08年運氣最差，屬土的她個人運得5年，他說：「22歲至27歲係唯一的個人高峯運，27歲係交界運，嗰年個人會混亂啲，之後係行旺夫財運，係利人。佢出生嗰日係戊子日，出年係戊子年，60年先出現一次，俗稱伏刑，運氣最差嘅一年，有喜事如結婚生仔就可以化解，所以08年係關鍵。」吳佩孚指陳文媛08年犯太歲，他說：「佢喺08年中會遇上感情問題，有7成結唔成婚。」
