「綻放異彩、春色無邊」，呢句係同志團體女同學社搞嘅全港第一個網上同志電視台G．TV嘅口號。驟眼睇句口號，好多人或者會以為呢個電視台會播啲拍得住「疑似女星」淫照風波嘅嘢畀大家睇。如果你咁諗就大錯特錯，因為呢個電視台只會播同志健康生活一面，唔會挑戰淫審處尺度。
女同學社創辦人之一小曹話，傳媒集中報道同志衰嘢，好似自殺、心理唔平衡或描寫到啲同志陰陽怪氣等等，令社會對同志誤解多多，因此要為同志平反，搞個電視台介紹同志正氣嘅一面，例如TB教煮餸，新書推介同性教育等，節目清一色由同志製作。市民可登入G．TV網址 http://www.gdottv.com睇吓同志點生活。