上個禮拜五花旗股市升咗唔夠100點，但係昨日港股就升咗900點有多，好似唔多啱比例，不過，經過上個月之後，大家都知道𠵱家港股有幾咁波動，挾隔夜嘅期指倉就更加唔使客氣，裂口高開或低開近千點，已經係好閒嘅事，昨日港股嘅走勢就係反映呢種狀況，並冇其他特別意思。
恒指報收25032，高過20日線少少，下個阻力喺25824，會唔會挾上去好難講，因為個市喺假期前偏靜，挾淡倉一啲都唔出奇，不過要企喺高位收市恐怕就冇咁易，但國企股炒賣氣氛好轉，短線仲有唔少炒作機會。
建行C輪7899：建行（939）昨收6.2元，升破咗條下降阻力軌同埋條20日線，今日應該會試吓6.6元，破位就睇7元，可以諗吓隻C輪7899，隻輪昨收91仙，槓桿率6.8倍（有效3.9倍），正股升上7元，7899可見1.43元，正股跌穿5.85元止蝕。