網上淫照風波搞到香港滿城風雨，連一代風流才子倪匡都有留意事件。同倪匡份屬老友嘅毓民噚日喺維園為社民連年宵攤檔開幕時話，日前佢同倪匡傾電話，講起呢件事，倪匡批評警方咁樣執法好戇居。毓民仲爆料話，倪匡出咗名鍾意收藏啲鹹相同四仔作個人欣賞用途，唔通警方又去拉人兼封屋？
只針對存有淫照網民
毓民講笑咁話：「我去親美國，佢都話有正嘢，問我睇唔睇㗎！」毓民認為，成人睇呢啲相同電影屬個人生活取向，但𠵱家一哥鄧竟成係又拉唔係又拉，搞到人人自危，真係好過份。佢又話香港唔少人嘅屋企都有過百隻四仔，如果警方咁樣無理拉人法，真係請多十幾萬個差人都未必夠。
毓民強調，雖然佢個人好同情受事件影響嘅藝人，亦唔反對警方執法，但警方近日針對只係喺部電腦存有淫照嘅網民，拉人兼唔准保釋，拉人時仲要黑布蒙頭，佢就鬧呢啲執法手段明顯係矯枉過正，「搞到好似拉恐怖分子咁」。