鄭秀文（Sammi）成為教徒後活力十足，噚日佢去完金鐘教會，之後又同幾個教友去「富豪飯堂」福臨門嘆茶。薄施脂粉、戴咗眼鏡嘅Sammi見到記者影相，初頭都表現愕然，之後佢回復「鄭四萬」笑容，與教友飲茶。
「希望佢哋勇敢面對」
前晚Sammi就到港台支持「雪中送暖」活動，同劉德華、陳慧琳等合唱，對於警方搜獲千張藝人淫照，佢話：「太好，呢啲人行為好差，唔理啲相係真定假，都對佢哋影響好深，希望佢哋勇敢面對，以正面嘅態度睇呢件事。」
此外，明嘉福太太李祝齡同女兒明美連都有去福臨門飲茶，明太講到乳癌病情時話：「身體都完全康復，𠵱家每兩個月睇一次醫生，之前先去完美國治療。」問到明嘉福嘅血友病病情時，明美連就話：「幾好。」