上個禮拜，聯想（992）以1億美金，將蝕錢多時嘅手機業務聯想移動賣咗畀四隻私募基金，當中四成權益賣咗畀小象創投同SuperPioneer兩隻基金，根據聯想嘅通告，呢兩隻基金都係由一位叫楊向陽嘅人擁有。
通告冇乜呢位楊生嘅介紹，但大陸傳媒《新浪科技》就喺自己嘅搜索引擎度，搵到楊生嘅資料，仲致電搵到個承認自己係楊向陽嘅人傾咗兩句。
據新浪報道，呢位楊生一向投資內地嘅生物醫療，係深圳源政創業投資創辦人，兼深圳清華源興生物醫藥科技董事長。至於嗰間清華源興係楊生同清華大學合作成立。
清華舊生 開礦蝕大錢
楊生係清華畢業生，1980年入讀清華嘅應用數學系，87年研究生畢業，教過兩年書，之後就去咗深圳創業。報道仲引述楊生嘅同學講，楊向陽係一個豪爽、敢於冒險嘅人，曾經去貴州開礦，結果失敗收場，差啲連返屋企嘅搭車錢都冇。
華華翻查過資料，喺02年時，康健國際（8138）行政總裁曹貴子亦曾經同清華源興簽訂過合作建議，合作發展生物醫療，喺內地設立基因檢測及研究中心，開拓大陸嘅醫療市場，當時曹貴子仲同楊向陽拍照留念。
仲有一樣要提，中國信息產業部上個禮拜頒發首批TD手機入網許可證，6家企業過關，除咗電訊設備股龍頭中興通訊（763），聯想移動都有份，楊向陽一入股就即刻有利好消息，真係幾好彩！