男人鍾意飲花酒，但女仔就會好似我咁……得閒鍾意飲花茶。皆因呢啲花茶，唔少係有玫瑰花、百合花同茉莉花，具有美容同消脂功效，梗係令貪靚嘅女士們趨之若鶩。
最近行開city'super，竟然畀我見到喺內地好出名嘅酒樓「丹桂軒」、專登在香港推出「花之工藝茶」系列，仲有九款唔同品種選擇，啲名仲改得好有詩意，好似「仙女散花」、「萬紫千紅」同「心花放」，每包80蚊。
花茶最特別嘅地方，就係將已經脫咗水嘅鮮花縫置喺一個小球狀嘅銀針茶葉入面，當冲熱水嘅時候，佢就會做到好似開花嘅效果，成個花形出晒嚟，真係好鬼靚，飲嘅時候更加令我覺得自己零舍優雅！
丹桂軒董事梁偉源話，佢哋仲推出「什錦花之工藝茶」同「九魚圖賀年禮盒」，全部都係趁新年時推出，打算畀客人買嚟送禮。問佢點解唔出埋酒樓最熱賣嘅賀年糕點，梁生就話怕香港天氣會令糕點容易變壞。所以今次小試牛刀，如果反應好嘅話先會考慮推出其他產品，甚至開埋專門店。
逢周一至周四刊出