內地企業最豪爽賬災機構，非中海油（883）莫屬，佢哋捐出3200萬人仔，董事長傅成玉仲親自打電話到災區了解情況，要求一日內將慰問信同捐款送到各省政府。
送暖畀同胞唔係一味講錢，最近傳有意嚟港上市嘅特步國際，拍住摩根大通齊齊捐出5000件自家羽絨褸，總值200萬人仔。咦，佢嘅競爭對手波司登（3998）同李寧（2331），好似冇乜賑災活動噃！
體操王子未行動
雪災後，波司登同李寧嘅股價升唔少，波司登喺1月28同29號分別升14同11%，噚日回番，收報2.02蚊；李寧噚日先發力，大升11%，收報24.9蚊。兩間公司股價「受惠」雪災，係咪應該救吓雪災中嘅同胞呢？
另外，食品商旺旺、統一、頂新國際旗下康師傅（322）等，都派送方便麵同飲料到災區。安徽皖通高速公路（995）旗下4條公路，由2月2至6號免收通行費，都算係另類賑災。