賭股海王集團（070）舊年8月初，被公司註冊處通知，話個中文名同另一間公司撞咗，要求佢哋改名。諗咗半年，最後俾佢哋諗到「海王國際集團」，呢個名仲要等班股東通過，亦要等公司註冊處批准先可以落實用，至於英文名就冇事，可以沿用番舊有個NeptuneGroup。
「國際」化為保名字
不過，華華有興趣嘅唔係海王嘅新名，而係同佢撞名嘅係乜公司。根據通告，公司註冊處話佢哋個中文名同一間叫「海王集團（香港）有限公司」太過似，中文名只差「（香港）」，容易令人混淆。
據公司註冊處嘅資料，海王集團（香港）有限公司其中一個董事叫張思民，咁啱創業板公司海王英特龍（8329）主席又係叫張思民噃，華華睇過海王英特龍當年招股文件同註冊處資料，兩份文件嘅張思民報住地址都係深圳南山區南油大道海王大廈。不過，華華喺海王英特龍嘅年報同招股文件都搵唔到「海王集團（香港）有限公司」呢家公司名，睇怕應該係海王英特龍母公司旗下嘅其他子公司。