美國係次按風暴嘅源頭，亦係風眼所在，但影響就遍及全球，特別係歐洲金融機構更承擔重大損失，連累到股市亦大崩圍。
中港兩地銀行亦受次按風暴所累，滙控（005）已作出重大撥備，其他亦會陸續有來。短短幾個月，港股由高位31958跌到21709，大跌32%，而計上周五收市的24123，亦下跌24.5%；反觀美股，由去年10月中歷史高位14198回落，上周五收市12743，只跌咗10.25%，跌少港股一半有多。
大市快見底
又睇上個禮拜，美股道指就上升4.4%，係5年來表現最好的一周，而港股則由25122跌到24123，跌幅3.98%，莫非風眼地區受損程度通常都較輕？港股是否跌過龍？港股又是否已經到底？
恒指已係第二次跌穿250日線再上返去，早一日講過，個別股票嘅走勢已參差到底，只要情況持續且一路擴散，則大市到底的機會亦越來越大。通常跌市開始時多係弱勢股行先，到強勢股「殺落去」弱勢股見底之時，跌市就接近尾聲。
大價股先行
上個禮拜，已大幅回落嘅國企、中資同實力股消息股好多都回升，上周五H指就大升799點，升幅6.4%，而一直相比大市為強勢的本地地產股終於回落，只要地產股跌完，大市就可確認到底。
微軟突然出招，以3470多億元收購雅虎，令雅虎股價大升48%，亦推高其他科技股，預期科技股會因併購潮而掀起炒風。
另外，沉寂已久的內地房地產股，上周五亦齊齊發力勁升，在50大上升榜中，內房股就佔咗8隻，而頭4隻升幅都超過一成，且全部都係大價股，例如富力地產（2777）大升15.2%、中國海外（688）升12.4%、合景泰富（1813）升11.6%同遠洋地產（3377）升11.4%。筆者在年初時的展望中，認為內房股係今年必買嘅股份，可趁低吸入，只要內地宏調一放緩，內房股就會飛升。
炒科技股，可選擇股價已大幅調整的聯想集團（992），唔計最近跌到落3.87元，就以上周五收市的5.52元計，同高位相比亦跌咗五成，集團最近宣佈第三季業績，比市場預期為佳，好多大行都睇番好，短線博入，有機會賺兩至三成。