𠵱家可以話係香港大學醫學院120年以嚟最差嘅時候。發出呢句咁嚴厲批評嘅，係港大舊生兼校務委員會成員梁智鴻，佢最近同八方傾開呢排嘅是是非非，十分勞氣咁炮轟港大醫學院上下唔團結，靠食老本，好唔掂。
有120年歷史嘅港大醫學院向來好威水，國父孫中山都係畢業生校友，但近排爆出私症混賬之後，啲教授又搞到不和要告上法庭，換肝隊人拍枱唔撈，金刀梁眼見港大醫學院搞成咁，除咗呼籲後輩要努力外，仲話嚟緊要搵個強勢院長領導至得。
要細訴醫學院威水史，真係一疋布咁長，第一任院長白文信成立香港西醫院，後嚟改為醫學院，歷史早過香港大學，仲創下無數個第一：40幾年前第一宗開心臟手術、然後首宗換腎、換心等等，但係一向咁有水準嘅醫學院，近年只有喺03年沙士爆發時威過，當時係全球最早搵到沙士係乜，但之後就負面新聞一波接一波。
金刀梁對醫學院形象跌watt感到切膚之痛，因為佢係港大62年畢業嘅舊生，師承威震中外嘅王源美教授。金刀梁好難過咁話：「港大醫學院一向都好有威望，香港大學咁出名，都係因為醫學院。但近年醫學院靠食老本，仲係靠緊前人種下嘅成果。」
要有機制選部門主管
由前院長林兆鑫私家症賬目問題搞到滿城風雨開始，港大名醫一個一個咁出去轉做私家搵真銀；內部又傳不和，前年換肝之父范上達都話走，最近仲有兩個識做肝移植嘅醫生因為內部衝突，一個唔撈一個俾人調咗；兩個內科乙肝教授廖家傑同黎青龍鬧交鬧到上法庭，追埋啲十幾年前用嚟買「跑車」嘅錢……真係睇落仲閉翳過《白色巨塔》。
金刀梁擰晒頭咁話：「𠵱家醫學院好唔團結，可以話係最差嘅時候，我好希望大家可以將醫學院搞番好。」佢會喺校董會討論醫學院近年嘅事件同發展，並且提出呢個時候醫學院係要一個強勢啲院長至得，仲要有機制去選部門主管，解釋吓點解有人屆屆冧莊。
自從前院長林兆鑫辭職之後，佢個位一直未請到人，𠵱家兩個候選人一個係署理院長梁憲孫，一個係華盛頓大學腸胃科部門主管兼港大校友李心平。據說兩位都好隨和，未必係強勢領導嘅風格，要擺平啲做咗幾十年嘅老臣子，真係有難度。
八方就建議，不如搵阿瑟王李國章嚟做，佢咁強勢，又一手搞起中大醫學院；另一個人選，不妨考慮曾經強勢嘅楊永強。