疑似藝人淫照事件轟動全港，早年被傳與陳冠希力爭鍾欣桐（阿嬌）而鬧不和的余文樂，昨日對淫照一事顯得十分避忌，而大部份藝人則寄望事情盡快解決。
余文樂避談撞膊
「喺呢個時間唔畀任何意見啦，呢件事都夠多聲音，應該交畀警方處理，自己最好唔好講咁多，講未必幫到件事。」不過樂仔也因此事而被翻舊賬，被重提與Edison爭鍾欣桐的「撞膊」事件，他支吾以對說：「乜都好啦，隔咗咁耐啦，我都唔識講呀。」問樂仔曾否看過該批淫照，他說：「邊度仲有人周圍send畀人？唔想我啲朋友俾人拉呀！」
鄭中基大嘆反感
「我連宣傳相都好少影，我唔太鍾意影，我影親相都冇乜甫士，所以我唔會係影相擁躉。」問他可有慰問阿Sa和阿嬌？他說：「畀啲時間佢哋，我反而就有同千嬅講生日快樂。」問他對於淫照會否反感？他說：「唔知點答你，影唔影係個人喜好，唔可以講，但係之後發生嘅事就反感囉！」
何超儀預咗甩底
問何超儀的演唱會會否請Edison做嘉賓，她說：「你哋嚟睇咪知囉，件事唔再講喇，已經講咗咁多日。如果佢甩底嚟唔到做嘉賓我都會明白，咁咪自己唱埋佢囉！」
鄭融努力前望
「今日出嚟係綵排林一峰嘅音樂會，我哋應該尊重一峰。唔想再講件事令大家轉移咗個焦點，大家努力向前望啦。」
米雪揼放相人
「希望快啲平息件事啦，呢啲事發生喺邊個身上都唔好，盡快解決，大家開心啲過年。快啲拉晒放相出嚟嘅人，拉到嗰個要揼佢。其實影唔影呢啲相係好個人嘅問題，如果話公開出嚟就唔好。最近有人話我知，我都俾人移花接木，啲人咁多手，一定有因果。」
鄭希怡大讚警方
「警方好快手拉到人，做得好，我覺得呢幾日好明顯大家都驚咗，所以已經冇咁明目張膽，真係要多謝幫手嗰班人。」
對部份網友批評政府打壓網絡自由，鄭希怡說：「有自由，唔上載意識不良嘅相就冇問題，所有正面訊息大家都唔會阻止。」
