家陣樣樣嘢都講環保，減少浪費，中信嘉華銀行為咗鼓勵員工循環再用，唔好浪費有用資源，最近號召同事捐出舊書同光碟，結果反應熱烈，喺短短嘅3個禮拜內，就收集到1903本舊書同埋355隻光碟，一次過捐畀慈善團體基督教勵行會嘅九龍灣同旺角中心，喺呢兩個中心成立「中信嘉華圖書閣」，畀低收入人士同埋內地新嚟港嘅小朋友閱覽。
中信嘉銀唔係就咁捐咗啲書就算㗎啦，佢哋仲喺31號圖書閣開幕日，搵埋中信嘉華企業義工隊嚟幫手，同班小朋友講故事，一齊玩遊戲同大派禮物，班小朋友有得玩、有禮物收梗係高興啦。不過華華仲開心，見到近年咁多大企業主動參與社會公益事務，希望呢陣公益風越吹越勁，更多企業加入。