無論是否陳冠希（Edison）緋聞女友，相信眾女性若看到近日的疑似陳冠希與女星的床上照片，都各有想法，韓君婷、莊思敏及林子萱昨日出席同一活動，其中莊思敏覺得無論事件發展如何，Edison也應該協助警方調查。
疑似陳冠希淫照事件發展至今仍未降溫，全城均熱烈探討，議論紛紛，韓君婷昨日與莊思敏及林子萱於尖沙嘴出席婚紗展，三人均與陳冠希毫無關係，反而可以較客觀作出評論。
「翻轉豬肚係屎」
韓君婷說：「件事發生咗，我只係想到一句說話，就係翻轉豬肚就係屎，任何人都唔可以相信。愛情都要有尊重，愛嘅時候要有理智，影親密相同被影都要反省，點解要影呢啲相呢？分手咁點算，好似離婚都要傾下啲錢點分。」
莊思敏認為陳冠希該盡快返港協助警方調查事件，她說：「呢件事真係太誇張，唔知有乜目的，其實可以私下解決，我唔想知影呢啲相嘅人乜心態，心理醫生會分析，不過我覺得Edison係唔係應該要返嚟協助調查呢？」
林子萱勸咪影
林子萱則說：「拉咗人，咁大家真係要留意同自省，啲相點傳出嚟都好，發放嘅人係要負好大責任，作為女仔，我點都唔會影呢啲相，幾愛都唔可以影。」
採訪、攝影：胡比
全城熱話：陳法拉有被侵犯感覺
淫照事件連日來轟動全港，縱使警方聲稱已捉到接近發放淫照源頭的疑犯，昨日眾星仍是以淫照事件為話題。
陳法拉 感同身受
「發佈相片嘅人係想引起大家注意，我就一直冇收過啲相，希望件事快啲告一段落。我之前有睇過自己俾人移花接木嘅相，造得好假㗎，睇咗之後有種俾人侵犯嘅感覺，我諗點解嗰個人可以拎我個頭做啲咁嘅嘢？」
Freeze 事事小心
石詠莉：「咁好可恥囉，我試過俾人hack入電腦偷生活照，再上傳上網扮我，當時都驚㗎，報警又唔係，唔報又唔係」。
陳樂榣：「（捉到）近個源頭都係好事吖，希望可以快啲將啲人繩之於法啦。我都試過唔見過電話如數碼相機，不過好彩係啲普通相。」
甄穎珊：「我個人覺得身為藝人嘅，相片真係要小心啲，我認為用另外一個硬碟機獨立儲存會穩陣啲。」
梁詠琪 監管網絡
「聽到話拉到人，可以起阻嚇作用係好事，呢樣係正面訊息，大家應該正視濫用互聯網問題，全世界都應該要加強立法。」她被問到首名被拘查的涉嫌發放淫照男子，遭扣留兩個月，她說：「我唔熟法律，所以唔想評論，但要有阻嚇作用，就需要懲罰。」
王菀之 大讚警方
「我不嬲都相信警方效率，呢件事對藝人造成好大壓力，好彩今次市民都用理性方法去睇，支持受影響嘅人。我冇聯絡過Rosanne同埋其他涉及人士，總之會精神上支持佢哋。」
張繼聰 專人修理
「根據演藝人協會嘅指示，我哋唔方便就呢件事講太多，不過作為一個市民，睇到警方咁快拉到個真兇係一件好事，不過大家唔好再談論呢件事，因為點都會對某啲人造成傷害。由於我細佬識整電腦，所以我個電腦有事一定會畀佢整先。」
關心妍 好彩唔熟
「知道警方拉到涉案人士好開心，我一直都相信警務人員會盡力去查，好彩我同佢（Edison）完全唔熟，又未合作過，只要有少少合作都會被寫有份，好似周麗淇（Niki）都被傳，不過Niki冇事，佢不知幾開心。」
泳兒 洩素顏照
「呢件事點樣去懲罰做錯事嘅人係由警方決定，大家都唔知佢儲埋幾多相冇公開，但今次警方拉到人都有一個警惕作用，話畀大家知不道德行為會受到懲罰。我之前都有電腦壞咗拎去整，我拎去整之後先醒起有啲冇化妝相，都有啲後悔俾人睇到。」
吳浩康 同情阿嬌
「呢段時間我唔想打電話煩阿嬌，但係有人做錯事俾警方拉到值得高興，但係公司有同事遇到一件咁嘅事就唔值得開心。如果我自己個電腦有事的話，我會叫識得整電腦嘅朋友幫手整，因為唔止相會影響到其他人，電腦入面仲有其他資料同藝人嘅電話。」
蔣雅文 壞機即棄
「我一向都會將影完嘅相整落另一個harddisc度，同埋我嘅電腦一壞都唔會拎出去整，因為部機用得幾年都差唔多時候要換啦。不過我冇打電話畀阿嬌，因為佢都病緊，等佢休息多啲，而且冇乜嘢需要安慰，佢病好自然會出番嚟做嘢。」
