醫管局行政總裁蘇利民（ShaneSolomon）喺澳洲嚟香港工作，初嚟甫到住喺半山豪宅MayTower，佢同八方講，近日已經搬屋，由半山搬過海，𠵱家住西貢，蘇利民話嫌MayTower噪音太勁，所以要搬屋。
MayTower住戶好富貴，梁朝偉、劉嘉玲以前都係住客，好多名人鍾意大廈私隱度高，正常情況下應該冇乜噪音，可能蘇利民喺澳洲生活習慣寧靜環境，聽覺特別靈敏，嚟到香港住半山都嫌噪得滯，搬去郊區舒服啲。
半山同西貢噪音差幾多好主觀，兩處租金差距卻有數得計，MayTower租盤最新行情呎租逾40蚊，西貢獨立屋租金呎價最多30幾蚊，蘇利民年薪逾400萬元包房屋津貼，住西貢較方便返工，又慳番一大截。