疑似藝人陳冠希（Edison）、張栢芝、鍾欣桐（阿嬌）和陳文媛（BoBo）的淫照風暴鬧得滿城風雨，警方前日拘捕多名懷疑藏有並涉嫌企圖發放淫褻照片者，馬浚偉昨日直斥拍攝淫照者行為下流，他說：「有呢鋪癮影呢啲相，仲要畀其他人睇係好下流嘅行為。」而栢芝舊愛陳曉東則搶閘派利是，希望受淫照事件困擾的各方人士忘記不快。
無綫劇集《秀才愛上兵》男、女主角馬浚偉和鄭希怡（Yumiko）等，昨日齊集九龍灣EMax宣傳，雖然《秀》劇首周平均收視只有28點（即約有176萬觀眾收看），成績欠佳，但劇中主角馬浚偉卻言論出位，對近日網上流傳疑似藝人淫照風波，及警方已拘捕多名疑犯一事，顯得極度關注。
呼籲自愛
「影你嘅唔係真心愛你」
昨日馬浚偉一度激動地說：「係咪真兇就唔知，相係邊個影同啲相真假亦唔知，但有呢鋪癮影呢啲相，仲要畀其他人睇係好下流嘅行為，如果對方係你女朋友點解要影呢啲相，無論個女仔精神狀態清唔清醒影佢，你對佢有份愛你都影唔落啦，我都有同身邊男性朋友傾過，大家都話唔會專登影呢啲相，除非真係有鋪癮啫。」
馬浚偉又以事件作借鏡，向時下女性作出呼籲，他說：「奉勸時下女孩子，唔單止明星，睇番好多討論區都會睇到好多人將以前同女友或者男友色慾片段放上網，所以大家對電話同相機都要敏感啲，我都有教我啲姪女要小心，唔好隨便畀人影相，尤其咁私人嘢，畀佢影唔代表愛佢，影你嘅亦唔係真心愛你，所以唔見電腦或者電話都已經係其次，最重要係做乜嘢要畀佢影先。」
至於身為鍾欣桐好友的Yumiko，對於有消息指被拘捕的涉案人藏有千多張色情照片一事，表示感到非常誇張，她說：「冇諗過有咁多張相，多謝警方幫手令啲相唔好繼續流傳出去。」問到Yumiko拍攝者的行為是否很卑鄙？她支吾以對說：「唔識講，總之我有傳過短訊畀阿嬌，佢過完年應該會復工，呢個時候唔會打畀佢，佢自己要過呢個心理關口。」問她是否慶幸沒有遇上這類男人，她無奈地說：「唔講呢啲，大家都唔想，我都回應咗呢件事4日，希望事件可以告一段落。」
避談栢芝
「非禮勿看、非禮勿想」
此外，張栢芝前男友陳曉東昨日在葵青劇院演出，被問及淫照事件時，東東似是有備而來，自言本身是佛教徒，要引用佛教想法作回應，先作狀拉埋嘴唇說：「非禮勿言。」再戴上太陽眼鏡說：「非禮勿看。」之後又戴上耳筒說：「非禮勿聽。」最後敲一敲頭頂說：「非禮勿想。」
其後東東突然從褲袋拿出一大叠利是，謂覺得農曆新年前各行各界包括警察、藝人及傳媒都很困擾，所以率先派利是，希望可以令大家將不快事忘記，新年過得開開心心。問到東東是否想冲喜娛樂圈？他說：「近排咁多人唔開心，影響情緒，我希望帶頭祝大家新春大吉。」問到他有否慰問栢芝及警方拘捕涉案人士時，東東再次作狀拉埋嘴唇說：「我對成件事嘅態度一樣，封口唔講。」
採訪：卓寶花、馬建華
攝影：陳志嵐、陳俊強
