舊年12月，華華曾經去過思捷環球（330）嘅股東會，按照以往慣例，管理層都會喺會後同傳媒傾兩句，點知舊年管理層居然罕有咁唔見傳媒，搞到華華撲個空。
上個禮拜，華華見到思捷副主席兼財務總裁潘祖明，佢劈頭就話要為上次單嘢解畫。佢話舊年其實唔係唔想見大家，只係因為唔想講大咗，又要出通告又要出聲明，搞到大家咁煩就唔好啦！
一年兩次業績相見
潘祖明仲話，查實佢哋冇乜嘢唔可以同大家講，有重要嘅嘢，就更加想同大家分享，之不過舊年舉行股東會嗰陣，咁啱夾喺全年業績同中期業績中間。嗰陣時，上一年嘅嘢又講晒，新一年嘅預測又唔講得，咁到底仲有乜可以同大家講呢？就係咁所以唔見一眾傳媒啫。
佢仲同華華講，以後大家都係乖乖哋，淨係中期同全年業績記者會，先好嚟問佢哋問題，至於股東會呢啲場合，就唔使咁辛苦趕嚟喇，費事撲個空啦！真係會為記者着想。