鬍鬚曾親疏有別獨撐民建聯年宵攤位，早前因為人身攻擊陳太，搞到民望大插水嘅德成局長，噚日亦幫「自己友」撐場，去到民建聯陳鑑林同佢徒弟陳百里嘅地區辦事處主持開幕禮。
曾德成噚日一到場，除咗講政府會點樣幫內地賑災外，講得最多就係陳百里。曾德成讚陳百里好關心老人家，又話「百里之行，始於坪石」，唔知係咪暗捧呢位民記新秀上位，鼓勵佢參選立法會，不過陳鑑林對於係咪讓位畀徒弟不表態，強調黨內未討論選舉安排事宜。
坪石以前係已故民主黨區議員歐玉霞基地，歐玉霞過身後全面失守，公民黨余冠威得華叔力撐都攻不下，相信未來一段長時間都唔可能扭轉形勢。