有肌肉萎縮症患者購買「水貨」電動輪椅，發現收據的輪椅型號與定單不符，疑遭偷龍轉鳳。輪椅在保養期內故障，售方又「先斬後奏」維修，索取6,500元費用，事件糾纏多月，事主一度以法律途徑追討。有職業治療師強調，電動輪椅除事前評估外，售後維修極為重要，不建議用家購買「水貨」。
患有肌萎症的阿儀，僅餘手腕及頸部尚有有限活動能力。她的起居生活，一向依賴父母照顧，惟隨着兩老年紀漸大，力不從心。為減輕父母負擔，阿儀向慈善機構申請撥款，經職業治療師評估後，於06年10月購買了一部電動輪椅，「治療師建議嘅輪椅型號，『新車』差唔多6萬蚊，超過咗4萬幾嘅資助總額。」
操作噪音極大
限米煮限飯，阿儀決定購買「水貨」，「係一啲病人自助組織刊物，見有一個廣告話入口到價錢平一截嘅電動輪椅陳列品，價錢4萬8千蚊，保養一年。」為圓「自由」夢，阿儀年前決定選用「水貨」，但期盼已久的電動輪椅，卻為她帶來困擾。「我幫襯嗰間公司叫WilsonCompany，間公司無門市，開喺私人住宅大廈，我訂嘅輪椅型號明明係『TDX5』，試車時我唔識分辨，送貨後，間公司先補寄發票，上面寫嘅型號竟然係舊款嘅『TDX3』。」
不過，阿儀投訴時，對方卻另有說法，「姓趙嘅負責人，死口話定單上嘅『TDX5』寫錯，我買嘅係『TDX3』。」阿儀對此說法甚感懷疑，而更令她氣憤的是，該部輪椅操作時發出極大噪音，「我要求佢整，就一直拖延，最後爸爸幫我係部輪椅度加入隔音海綿。」
去年6月，即購買輪椅後8個月，阿儀發現輪椅失靈，遂送回該公司檢修。她表示，負責人未有報價，在去年8月尾便稱已修妥輪椅，並指因輪椅曾加海綿，屬私自改裝，致摩打被異物所纏，向她索取6,500元費用。阿儀感到對方「打死狗講價」，由於質疑該公司的經營手法，故她拒絕屈服，曾向消費者委員會投訴，該會調解無效，她遂循小額錢債審裁處途徑追討購買輪椅的4萬8千元費用。她氣憤地說：「呢幾個月，我冇電動輪椅用，被迫問人借部普通輪椅用，要靠人推，落街都落唔到。」
無錢惟有妥協
阿儀與WilsonCompany於上月30日在小額錢債審裁處開庭前達成和解協議，「對方要我畀幾千蚊，搵公證行反證部輪椅款式唔啱，我邊有錢，惟有接受和解，唔使錢攞番部輪椅！」不過阿儀表示，她取回「坐駕」時輪椅仍有異常，對方願意維修，預計兩個月才可取回。
本報多次聯絡WilsonCompany，向出售輪椅予阿儀的趙先生查詢，他只強調定單與收據上輪椅型號有異「解釋得通」，但拒絕作任何回應。
檔案編號：1024007
專業意見：使用前後應有治療師評估
醫院管理局轄下復康專科及資源中心高級職業治療師陳潔玲強調，病人使用電動輪椅前，必須由職業治療師評估，使用後也應由職業治療師跟進。她絕不建議選用沒有正式代理商的「水貨」，以免輪椅損壞時缺乏保障。「購買前要評估病者活動及控制能力、家居及周邊環境與需要配件，決定邊款電動輪椅適合。」
陳潔玲又指出，病人或家屬自行在輪椅加軟墊其實並不適宜，「唔同病人，病況、坐姿都唔同，喺輪椅上面有唔同嘅壓力分布，軟墊要配合唔同物料同尺寸，否則亂『攝』毛巾呢啲軟嘢，會影響健康。」她表示，市民如有需要，可致電復康專科及資源中心預約，電話：23642345，只需繳付數十元登記費，評估則免費。