電視明星大姐明幾年前患上抑鬱症，終日茶飯不思，鬱鬱寡歡，曾有自殺傾向，好彩得到朋友大力幫助，譬如老友陸軍裝曾患上「驚恐症」，揸架車一上獅子山隧道，就不知所措，手忙腳亂，揸車險象環生，試過三幾次之後，就唔敢揸車。陸軍裝得朋友介紹，到中文大學醫學院診治，痊癒之後，非常熱心幫助患上有情緒病嘅朋友，佢苦勸大姐明到中大求醫，卒之搞掂咗。大姐明擺脫抑鬱症後，精神暢旺，若有所悟，比陸軍裝更有決心幫助他人，在二○○四年直情創辦一個「心晴行動慈善基金」。
呢個基金係香港唯一專注情緒健康嘅註冊非牟利慈善團體，目標係教育大眾認識情緒病，幫助患者及家屬，推動社會關注情緒健康，減少誤解，消除歧視。基金以創辦人林建明為主席，基金信託人有林建明、李鵬飛、康寶駒及何鐵文，顧問團有好多城中名人及醫生、律師、社工等等。
呢類慈善基金，並非富有機構，日常提供之服務如校園情緒健康教育計劃，專業面談服務，熱線諮詢，轉介及公眾情緒健康教育講座等等，在在需財，需要社會人士支持。據大姐明等友好通知，「心晴慈善行動基金」將舉行成立以來第一次賣旗籌款，喺三月二十六日星期三上午七時至十二時三十分於九龍區舉行，籌款目標係八十萬。
賣旗籌八十萬，唔係嘢小，即使有一千人（義工）上街幫手賣旗，都要每人賣得八百元，難度甚高。大姐明嘅義工同左丁山講：「賣旗日唔係我哋揀嘅，係由社署分配，碰啱三月二十六日係學校復活節假期，學生唔使返學，所以我哋搵好多學校聯絡，校長都話愛莫能助，因為學生放晒假，派唔到學生幫手賣旗。𠵱家當務之急係搵到足夠熱心義工上街賣旗，籌到幾多錢，現時唔擔心得咁多。」咁講法，各位《蘋果》讀者之中，如果想幫忙「心晴行動」嘅，請與林建明或「心晴行動」聯絡，捐款也好，做賣旗義工也好，佢哋都歡迎，可傳真至21446331或致電29478669找林麗珠小姐。