今個禮拜就係農曆新年，近排嘅新春飯局亦特別多，華華嘅飯局排到密麻麻，前幾日同幾個保險界朋友食飯，一班年輕人百無禁忌，乜都講得一餐，席間就有個朋友忽然興起，話要爆啲保險業界嘅內幕消息。
佢話保險公司提供嘅保險項目多不勝數，小至幾百蚊門診服務，大至高額賠償嘅人壽或意外身亡，所以啲保險公司經常都有好多投保人上去排隊申請索償。
話說某家保險公司，喺業界出咗名索償人數特別多，某日嗰家保險公司有位職員放工，見到一班公公婆婆木無表情咁坐晒喺客戶服務中心，奇怪嘅係，班公公婆婆一粒聲都唔出，總之就係安安靜靜咁坐喺度，結果，嗰位職員第二日冇返工，因為嚇到病咗幾日。
紅衣女靜坐會議室
華華第一時間問，邊間保險公司咁「猛料」，點知嗰位保險界朋友故作神秘話：「公司名第一個英文字同你公司（蘋果）一樣。」啋鬼過你咩！
「辣」得人，呢位朋友亦唔怕將自己公司嘅「猛料」公諸同好，仲話：「做得呢行預咗會見到呢啲嘢。」
佢話公司有間會議室，專用嚟招待傳媒朋友，有一日，無啦啦有位着住成套紅色衫嘅長髮女士坐喺入面，「嗰日我哋冇搞記者會，問過又冇人約咗訪問，間房之前又冇人book……」見到咁嘅情況佢唔敢出聲，只係事後先同啲同事講「見到嘢」。
華華當時第一個反應係同呢位朋友講，「下次約上去貴公司做訪問，麻煩安排另一間conferenceroom（會議室）畀我哋，無謂嚇親同事啦！」
電郵：mailto:[email protected]