星期六同某個股壇前輩傾開近排嘅股市，佢同敏妮講，近排好多朋友問佢有乜股票可以炒，佢嘅答案係：「冇！」股市波動，似乎越資深嘅投資者，portfolio裏面嘅股票就越少，前輩話：「呢個市搵唔到幾多隻好嘅股票，正路吖！呢個時候唔係搵邊啲股票炒，而係盡量搵好嘅時機，將買咗嘅股票沽。」呢啲就係所謂嘅持盈保泰。
股市波動持盈保泰
前輩仲話，即使係牛市，亦唔代表投資組合裏面越多股票越好，「敏妮，記住，portfolio裏面，唔係股票越多越好，而係股票越賺錢越好。」所以佢教敏妮，無論股市喺乜嘢情況，你心裏面只需要monitor住幾隻心水股已經足夠。幾隻賺錢嘅股，好過一籃子嘅股有賺有蝕，到頭來得過桔。
同樣道理，敏妮覺得放喺任何嘅投資產品都一樣。可能由於股市太過波動，所以多咗朋友問敏妮有關基金嘅問題，最常見嘅問題係，朋友見到報章雜誌提到某隻基金回報率高，就會問隻基金喺邊度買？其實，好多銀行都有代理唔同嘅基金，可以上銀行嘅網頁check吓。另外，對基金唔熟悉嘅朋友，敏妮介紹你上去基金評級公司Morningstar嘅網 http://www.hk.morningstar.com，個網有好齊全嘅基金資料，仲有唔同年期嘅基金表現。
漁翁撒網盞嘥本錢
有投資者將基金當作股票，就好似見到報章提到某隻基金回報高就話去買，呢啲係投機唔係投資。另外，portfolio裏面有十隻八隻基金，敏妮都覺得好無謂，首先基金本身已經分散投資，過多嘅基金，就好似去澳門買大細，瓣瓣都買一樣，即使實有一瓣中，但付出嘅成本分分鐘比回報大。
網誌： http://wanmanil.com/blogs/