財爺鬍鬚曾對煲呔言聽計從，貫徹特區政府親疏有別精神，噚日大雨滂沱兼凍到入骨，仍然風雨不改去維園為民建聯嘅年宵攤位主持開幕。
懶理譚耀宗擦鞋
庫房今年滿瀉，立法會議員不分黨派要求財爺「派糖」，民建聯雖然視鬍鬚曾唔係自己友，主席譚耀宗噚日都借題發揮擦對方鞋，話庫房好似大雨下嘅維園，一片汪洋四處水浸，大讚鬍鬚曾腳頭好，「去到邊都水頭充足。」
譚耀宗落足鞋油都冇用，鬍鬚曾冇乜大反應，只係頻頻話：「好濕呀，好濕呀。」財爺咁講有乜玄機，係咪暗示會開庫派糖呢？八方唔敢穿鑿附會。鬍鬚曾之後送咗棵生菜畀民建聯，寓意大家「和氣生財」，佢又同市民拜早年，祝大家同老鼠一樣咁機靈敏捷。
記者追問鬍鬚曾今年究竟會點派糖，鬍鬚曾叫大家畀啲耐性，又話天氣好轉會再嚟行花市。譚耀宗就話，該黨年宵攤檔會同時為內地雪災籌款，詎料民建聯自身難保遇上「雨災」，希望過兩日天氣放晴，多啲人行花市，善款數字會理想啲。