白鴿黨一眾大佬農曆年鍾意外遊避年，已多年缺席維園年宵市場，今年係立法會選舉年，可能想博取曝光，今年重臨維園擺檔，副主席單仲偕今日主持開幕儀式，其他黨員會即席寫揮春向市民拜年同派財神海報。
情商尊子畫出肖像
其他政黨都有出售精品搵筆新年財，白鴿黨都唔例外，情商漫畫家尊子畫咗三款以華叔、馬丁同黨主席仁哥漫畫肖像嘅T恤應市，每件賣59元。負責人陳樹英話呢三款Tee限量發售，欲購從速，有興趣買嘅今日可以去277號攤位睇睇。
社民連都有喺維園年宵市場擺檔（6號檔），主席毓民著作係重點，亦有啲政治色彩產品，佢哋話會呼籲市民捐錢畀國內飽受雪災之苦嘅同胞，話晒血濃於水，香港人平平安安過年，都唔好忘記好多人受風雪之苦，有家歸不得。