國內雪災發展至今，隨着天氣預報未來一星期氣溫逐步回升，代表最惡劣時候已成過去，未來一段日子焦點將是災後重建。股市炒預期，當上星期五內地雪災仍然嚴峻之時，中資股紛紛大幅回升，預告這一次中資股大跌浪已屆尾聲。
中資股跌浪快完結
除咗炒雪災完結，市場亦炒宏調鬆手，人民銀行發出緊急指示，要求確保信貸供應，以幫助抗擊50年來最嚴重雪災。美林指出，這意味去年10月底實施的信貸收緊暫時解除，春節前後加息機會極低。除此之外，國家主席胡錦濤發表之講話謂要「科學把握宏觀調控的節奏力度」，亦被解讀為暗示宏調暫緩。
這邊廂中資股被過份拋售，遍地平貨，那邊廂地產股卻被沽售，因美國再減息都無得炒，香港息口再減空間已經有限，明顯是一次資金換馬大挪移，加上華置（127）投資證券大損手，股價暴跌，其他地產股亦有證券投資，唔多唔少會有影響。至少短期內，博反彈寧取中資股都勿掂地產股。
中資股目前肯定是十分低殘，除咗內房股，被沽得最慘肯定係保險股，平安保險（2318）增發加A股下跌，以及雪災賠償，對保險股影響係咪真係咁大？正是由於內地保險滲透率低，根本仍處於發展初階，所以遇上災難，保險公司的賠償亦相對唔大，中國財險（2328）及中國人壽（2628）應該仲有反彈空間。
光控打回原形抵博
上星期跌得最甘嘅中資金融股，仲有隻光大控股（165），該公司去年底已傳出分拆光大銀行有眉目，到上個月分拆終於獲批，不過股價只係炒咗短短兩三個交易日，升上28.70元即展開大跌浪，上星期曾低見14.30元，足足跌咗一半。擬先A後H上市的光大銀行，上周一已獲股東會通過其首次公開招股上市的議案，而光控16個幾嘅股價已跌至去年6至8月橫行區水平，分拆消息當未炒過，𠵱家買贏面頗高。