每年春節前都會喺維園花市擺檔、幫市民寫揮春嘅華叔，噚日見到民主黨老戰友馬丁嚟打氣兼攞揮春，即時興起，話要寫對揮春畀煲呔同選擇性檢控佢嘅黃仁龍。華叔大筆一揮，就寫咗「憑藉祖蔭，親者有權」畀煲呔，因為佢經常只識聽阿爺說話做事，唔理大部份港人希望盡快普選嘅聲音，仲要成日搞親疏有別。
至於黃仁龍，華叔就贈咗「當仁不為，亢龍無悔」畀佢，話佢冇做仁者應該做嘅嘢，亦冇高官應有嘅謙卑。好多政黨都會印啲揮春派畀市民，華叔認為不及親手寫咁有誠意；但對於今年亦喺維園擺檔嘅葉劉急急學書法寫揮春，華叔就話，寫揮春同做人一樣，唔應該咁急功近利喎。