國美電器（493）主席黃光裕一向錫老婆杜鵑，佢同老婆一齊揸住公司近四成股權，有錢齊齊分享。
最近黃光裕就將個人持有嘅90萬股國美，同埋透過ShineGroup持有嘅1.86億股國美，轉畀佢嘅屋企人。呢批股份佔國美已發行股本約5.66%，以上個禮拜五國美收市價17.4蚊計，價值32.52億銀，由此可見佢幾錫屋企人。家吓黃光裕同杜鵑仲揸住國美38.15%股權，兩公婆賬面身家有成220億銀。
華華諗番，另一個錫老婆嘅例子，就係SOHO中國（410）嘅潘石屹，佢同老婆張欣出晒名好恩愛，本來兩公婆各自揸住SOHO一半股權，05年尾，潘石屹以饋贈方式將股份送晒畀愛妻。
至於張欣就將所有股權注入信託度，家陣佢哋揸住SOHO中國66.48%股權，約值226億銀。