今日，宜：幫你的愛車洗白白。點解？仲使問，年廿八，座駕都要洗邋遢嘛。畀你一個好提議：同另一半拖住手仔齊齊洗，肯定越洗越Sweet。趁呢個機會培養感情就梗係好計，跟住嚟啦，事關過埋年，好快又到情人節，Subaru今年繼續請《蘋果》讀者食情人節大餐，等大家同Honey過番個免費浪漫夜！
記者：黎頌詩
攝影：林栢鈞
Model：Ruby、Brad
NTI師傅教路：
洗車似女人做Facial
洗車其實都有學問，為咗令大家順利搞到一車泡又唔會令架車越洗越花，我哋請嚟專業洗車公司NTI嘅師傅Alex教路。佢話，洗車就好似女人做Facial，要溫柔細心又細緻。「用具都好緊要，油漆掃、毛刷都好有用……」咁神奇？要學嘢喇！
洗車身 最緊要多泡圍
用具CheckList
a.洗車液
b.胎軨清潔劑
c.纖維抹布
d.油漆掃，約$25
（五金舖有售）
Step1：
洗車嘅第一步係同佢濕身，目的係冲走車身上嘅泥塵。呢步好重要，一定要夠徹底，因為如果殘餘嘅沙泥黏到洗車嘅海綿上面，會令車身越洗越花。
Step2：
用水開洗車液，份量大概20比1，將海綿浸入，記得用手多揑幾下，令泡沫增加，咁會更有效帶走污物。然後擦勻車身，至於廠徽同門把呢啲細緻位，用油漆掃清潔就最啱。
Step3：
跟住就到胎軨，油漆掃大派用場啦！將去油清潔劑直接噴上胎軨，再用抹布抹淨，螺絲位就用掃清潔。師傅話唔好忘記沙板位，用掃一樣可以掃得亁亁淨淨。
Step4：
完成上面步驟就再一次用水同佢冲個靚凉，再用抹布抹亁，就完成同車身洗白白嘅程序。
如果想再靚啲嘅話，就梗係做保養程序啦。水劑嘅車蠟較易用，為車身塗上時記得要用打圈嘅手勢。輪胎亦可以噴上保護劑，有修護同保養作用。
洗內櫳 布不能太濕
用具CheckList
a.抹布
b.軟毛刷
c.地毯及絲絨亁洗劑$48
d.去油清潔劑$24
雖然用具準備齊全，不過師傅話在一般情況下，內櫳用清水加抹布去清潔就足夠。如果堅持要用清潔劑，就切忌直接噴，最好用一塊濕抹布，將清潔液噴在抹布上令它稀釋。
抹中控台要特別小心，因為按鈕位有空隙，易入水，所以抹布絕不能太濕。
絲絨座椅嘅清潔較簡易，用水或噴亁洗劑都無問題，皮椅就要特別小心，洗皮水要噴在抹布上，而且要整塊皮洗避免出現鴛鴦色。
洗地毯就可以動用軟毛刷，刷多兩刷亁淨晒，地毯粗粗哋，噴清潔劑用水冲都冇有怕，洗完晒亁就搞掂。
產品查詢：
NTI快速汽車護理（23452193）
SubaruR1細粒的骰圍
洗到架車靚一靚，實在忍唔住要再Show一Show我呢架同可愛Look襯到絕嘅新座駕，咪就係SubaruR1囉！去年一推出我就搶住入番架，結果證明我有眼光，因為佢一出，就人氣爆晒燈啦！梗係，佢個樣Cute得嚟又醒目，總長只有3,285mm，的的骰骰，捐窿捐罅無難度，最啱女仔揸。能夠討女人歡心，靚樣固然好重要，車頭設計據講係源自飛機的飛翔姿態，幾醒！尾燈睇落粉紅色㗎，襯黑色車身好特別。內櫳仲襯晒色，紅黑配搭，同車身呼應番。
慳得就慳
仲有樣秘密要講你知，呢架車最啱我同Honey去玩番晚，因為前排座位好寬敞舒服，至於後排，就唔好意思啦，車細細就梗係窄少少，仲唔趕絕啲成日要搭順風車嘅電燈膽？放低後排椅背，擴大尾廂空間，放我嘅Shopping戰利品好過！買得呢類K-Car，就當然唔會好勇鬥狠啦，不過咁，軟腳蟹我就一定唔Buy，唔好睇小R1只有54匹，起步同加速表現都唔會令人失望，夠用！慳油又係一大賣點，仲有因為佢係環保車，可獲減首次登記稅，慳埋慳埋都好可觀。
SubaruR1規格
引擎：658c.c.直4DOHC
馬力：54ps/6,400rpm
扭力：6.4kgm/4,400rpm
傳動：i-CVT智能無段變速自動波
查詢：MotorImage（25112727）