上個禮拜五港股靠「六行三保」挾番轉頭升咗600幾點，當晚花旗股市都造好，今朝港股表現應該唔會差，不過，就嚟放長假，個市或者都會靜番啲。
睇圖表，25000點阻力唔細，如果恒指逼近呢個位，沽盤相信又會湧晒出嚟。花旗嗰邊冇錯係反彈緊，但係經濟前景唔掂，好多問題都冇辦法喺短期內解決，仲有債券保險個煲隨時爆，有乜唔妥，都會累街坊，大家炒港股反彈仍然要謹慎啲，有錢賺就見好即收，目標價唔好定得太高。
網通C輪6915：網通（906）上周五收25.25元，前個禮拜大陰燭一插到底，見19.6元，好快就升返上幾條平均線上面，短線睇27.5元，可以諗吓隻C輪6915，現價48仙，有效槓桿率4.3倍，正股升上27.5元，6915估計有4成升幅，但隻輪快夠期，只宜短炒，正股跌穿24元止蝕。