網上淫照風波搞到滿城風雨，發放淫照嘅人立心不良，八方宜得佢哋一網成擒，警隊偵騎四出，一哥特警成頻頻報喜，前日拉一個，噚日又拉多幾個，警隊咁落力值得一讚，如果元凶仲未落網，八方希望警方繼續追捕大老虎，唔好只係亂槍掃射打死幾隻「蟻民」祭旗就算。
網民人人自危
部份被拘捕人士只係因為部電腦有「淫照」而被拉，好多網民認為咁搞法好唔掂，全港網民噚日幾乎眾口一辭鬧一哥，事關如果個人電腦入面有幾張「淫照」就可能犯法，咁警員咪隨時可以上門拉人？八方唔係話人人電腦入面都有淫照，關鍵係如果張相淫唔淫由差佬決定，即是話一旦執法部門懷疑你電腦入面相片好淫就可以做嘢，咁仲唔係人人自危？
網上好多成人貼圖區，偷拍淫照不分晝夜無限量發放，如果一哥揸正嚟做，理應逐一上門拉人兼封舖，唔可以因為相中人唔似女明星，警方就視而不見睇完就算喎，八方希望警方唔好選擇性執法啦。
有網民指如果真係以相入罪，咁嘅恐怖執法行動離譜程度，同當年《基本法》23條立法以言入罪惡法不相伯仲，當時至少有條文畀市民睇清楚細節入面嘅魔鬼，今次卻魔鬼臨門拉人先知！
提議上街抗議
網上民意沸騰，有網民發起網上籌款行動，話要籌錢幫幾位慘遭祭旗網民打官司，認捐人數以幾何級數增加，有人更提議過年前上街抗議，成唔成事暫時未知。
真係做壞事嘅人，應該罪有應得，不過警方唔可以有殺錯冇放過，否則香港仲有法治？有人陰謀論話警方拘捕唔係相片源頭網民，可能係想轉移視線，事關早前雷射槍事件警隊俾人質疑選擇性執法，今鋪正好「戴罪立功」；又有人指如果今次被捕人士有錢請金牙大狀，有本事搵專家證人，隨時輕易甩身，呢啲陰謀論係咪好無稽或者成唔成立唔重要，八方希望一哥諗吓，點解市民𠵱家好似總係帶住懷疑目光睇警方做嘅嘢呢？
亦有網民惟恐天下不亂，戲謔今次淫照事件幕後黑手乃係最高領導人，目的係想大家掛住睇相八卦，暫忘天災之亂，減少批評政府，係另類疏導民怨嘅超級危機處理手法，呢種將快樂建築喺別人痛苦上嘅講法，認真唔要得。