寒流侵襲，香港日日凍冰冰，會計界立法會議員譚香文卻同交惡多年嘅會計師公會關係解凍。譚香文同八方講，上月底佢獲公會邀請，可以定期出席公會會議滙報議員工作，會方亦同意幫佢寄工作報告畀會員。
譚香文04年當選後，批評公會唔幫佢寄工作報告畀會員有封殺之嫌，後來雙方對簿公堂，公會敗訴，數口精明嘅會計師群起狂插公會同業界代表打官司勞民傷財。呢場風波隨公會轉莊逐漸平息，新任會長區嘯翔似乎冇乜政治野心，所以對譚香文比較友善。譚香文獲公民黨支持角逐連任，然而形勢不妙，因為中聯辦已出手擺平各路人馬，四年前落選嘅陳茂波未去馬已贏成條大直路，對手有排追。