喺賽車場飆完一輪之後，已經係接近下午四時，又係開始趕路返酒店嘅時候，而駕駛者亦變成同行的行家，我終於可安坐喺後座，繼續同周公先生見面啦，哈哈！
殊不知好戲在後頭，瞓到中途先記得要找多一個位置拍攝，所以要求行家「違背」廠方早已喺導航系統輸入嘅指令，喺附近周圍找尋適合嘅拍攝地點；可惜搵咗好耐都搵唔到合適嘅地方，咁就惟有「重拾正軌」趕返酒店，但路段係超窄同彎多嘅山路，即使行家開得有幾慢同穩陣，我同代理嘅靚女代表都覺得有些少暈車浪！
返到酒店將車交番畀工作人員之後，我哋就趕緊跑去記者會場地，幸好尚有時間，而且大會仲安排咗各式各樣美食畀我哋品嚐，Fit晒饞嘴的我嘅要求。
記者、攝影：鄭達基