疑似陳冠希（Edison）的網上淫照事件鬧得滿城風雨，曾與他傳緋聞的女星眾多，故牽連甚廣，應采兒也是其中一員，雖然她正沉醉於與陳小春的新戀情中，但她昨自爆其母為此甚擔憂，她表示沒到過Edison家，故毋須害怕。阿姐汪明荃則再澄清自己非謝霆鋒契媽，不過她也坦言好友狄波拉為張栢芝捲入事件感不快，阿姐說：「有乜好睇？個個身體都係咁！」
神秘人在網上發放疑似陳冠希及其他女星的淫照事件，令一眾曾跟Edison傳緋聞的女星人人自危，惟恐成為下一位受害者，連帶相關女星的家人也憂心忡忡。
采兒：裸露相免問
剛公開與陳小春戀情的應采兒也是Edison舊緋聞女友之一，她昨日到銅鑼灣出席時裝活動時，坦承其母為此擔心不已，她說：「我冇傳SMS畀Edison，只係feelbad，連我阿媽睇到都有問我，我就叫佢唔使擔心，因為我冇去過佢（Edison）屋企，而且我同佢都冇乜影過相。」
應采兒又謂很多外國情侶也會拍親密照，她說：「呢啲係好個人，為咗兩個人嘅情趣，但放上網就唔道德，總之大家都係受害者，包括佢哋嘅家人。」
問到應采兒會否擔心被男友偷拍交歡照，她反問道：「咁係唔係可以告佢㗎？係有罪㗎。我連性感相都唔鍾意影，正常情侶攬攬錫錫影相就OK，要唔nude（裸露）同唔見任何點囉，總之女仔要小心保護自己。」陳小春曾與張栢芝傳緋聞，問她知否男友對此事反應，她說：「等佢自己答，𠵱家係人都會嬲，我自己就冇收過e-mail，都唔想睇。」
阿姐：霆鋒非契仔
汪明荃昨日到天水圍出席活動時表示沒有看過網上淫照，她說：「真係好離譜，希望快啲拉到人，大家盡量都唔好睇，有乜嘢好睇？個個身體都係咁。」有人問阿姐有否慰問契仔謝霆鋒，她即鄭重澄清霆鋒非其契仔，並謂謝婷婷才是其契女。問到知否狄波拉是否很生氣，阿姐說：「拉姑嬲就一定㗎，不過我覺得時下年輕人唔能夠太開放，識朋友要小心啲，互聯網傷害真係好大，總之放上去嘅人就缺德，再睇又係缺德。」
阿倫：恐成壞風氣
日前演藝人協會對疑似藝人淫照風波發出的聲明中提到「這不單是娛樂圈的悲哀，亦是香港人的悲哀」，惹來網民抨擊，指聲明將香港市民拖落水，演協會長譚詠麟昨日在銅鑼灣出席願望成真基金記者會，他解釋說：「我哋係想話點解香港人鍾意睇呢啲相，如果成為一種風氣嘅話就悲哀，呢個係一個傷害人嘅話題，我哋唔係話每一個香港人都會咁做。」對於上載有關相片被捕男子鍾亦天被還柙八星期，阿倫說：「今次殺一儆百，等啲人貪過癮呀喇，真係過唔到年啦。」阿倫又指由於有關藝人已報警，故演協暫未能幫得上忙。被問到其子譚曉峰可知此事，阿倫笑說：「佢睇英文報紙㗎，我同佢操洋語溝通，佢冇問過我，我都唔會提起。」
家燕：要摑佢幾巴
另外，薛家燕前日在柴灣拍廣告時也謂有看過部份淫照，她說：「我唔知啲相係真係假，但無論整同上載嘅人都好唔啱，離晒譜。我好想知道整呢啲相嘅人係乜心態？」薛家燕指就算親密情侶也不需要拍下這些不雅照片留念，她說：「對女仔嘅影響係一世，人哋都有阿媽生，男歡女愛係冇問題，但整埋呢啲相好變態，我真係要摑整嗰個人幾巴，因為咁樣嘅行為絕對冇道德同冇人格。」此外，方力申大前晚力斥拍攝淫照的人心理有問題，他昨日在銅鑼灣出席電影宣傳時又說：「希望快啲捉到個源頭。」
採訪、攝影：駱華齡、李珮洳、王崇穎、黃文成
長情請看：唱K探班關係密
04年6月曾有傳陳冠希與應采兒秘密拍拖，二人曾被目睹公然在銅鑼灣拖手搭膊唱K，也有指當時Edison的潮舖Juice籌備開張期間，應采兒多次往時裝店協助打點。而她拍攝電影《柔道龍虎榜》時，Edison也公然往探班，二人關係顯然甚為密切，不過同時間Edison也約會女子組合2R的家姐黃婉君（Rosanne）看戲，男方因而被指一腳踏兩船。
事有湊巧：年宵啤牌食正熱潮
年宵市場前日正式開放，在銅鑼灣維多利亞公園年宵市場就有一副頗為應景的啤牌售賣。該副啤牌以「三國風雲」為名，以各知名藝人的三國漫畫造型印刷，啤牌中更包括近日捲入淫照風波的藝人陳冠希、張栢芝、鍾欣桐等，當中陳、張二人的肖像成為啤牌盒面的圖像，相當巧合。每副啤牌售港幣28元，兩副則售港幣50元。
醜事遠播：韓國網友熱搜報道
疑似藝人淫照風波不但震驚全港，連韓國也就事件作廣泛報道，當地搜尋網站雅虎韓國，昨早轉載了報章《每日經濟》的報道，竟錯指容祖兒是繼鍾欣桐及張栢芝後的最新受害者，該網站更登出祖兒的合成照，令她非常無辜地受到牽連。
栢芝《白蘭》受歡迎
由於張栢芝曾拍攝韓片《白蘭》，故為韓國人認識，而且頗受歡迎，故此事在當地也引起頗大迴響，張栢芝及陳冠希等名字連日來更佔據各入門網站的人氣搜尋榜前列位置，當地收費電視台日前更派出攝製隊來港跟進事件。