保姆唔易做　玩殘索女

成日有新聞話有保姆蝦啲小主人，講到啲保姆個個係衰人，不過其實保姆都好慘㗎！睇完《保姆日記》就知咩事。套戲改編自一本同名的紐約暢銷小說，女主角大學畢業，為咗生活費到上流社會家庭做保姆，喺嗰家人身上學識有錢唔等於快樂。雖然係小品電影，但感人得來卡士又勁，有靚女又搞笑，天寒地凍留喺屋企煲碟最正。

記者：洪偉順

女神幫人湊仔

相信好多人都唔會忘記《迷失東京》、《迷失決勝分》入面嗰位厚唇大眼、身材fit到爆嘅女主角史嘉麗，連大導演活地阿倫開唔少戲都搵佢，既係大導演愛將的佢亦係好多人心中的女神。故事講阿女神史嘉麗大學畢業，阿媽想佢去做金融第日可以搵多啲錢，可以生活快樂。不過女主角又唔知自己想做咩，對人生感到無助，結果走去做保姆，同一班上咗年紀嘅師奶爭食！初時貪佢在曼哈頓上流家庭工作人工高，又可以消磨時間，結果發現主人家問題多多：男主人只顧工作不理家人，喺出面仲養埋情婦；女主人就成日走去Social，對男主人出面搞搞震隻眼開隻眼閉。最可憐就是小主人冇人理，全家人一點都不快樂，有錢又如何？現時很多年輕人都唔知自己想點，同女主角當初一樣，以為掙錢先可以令生活快樂，不過事實唔係咁。

■去有錢人屋企做保姆，出街用LV買餸袋，誇！

■幫人湊仔都夠慘啦，仲要俾男主人輕薄。

𡃁仔唔係人咁品

小主人奎納出身上流家庭，要咩有咩，阿爸掛住工作，阿媽又唔多理佢，屋企又諸多要求，一啲都唔快樂。對住史嘉麗呢個保姆就百般糟質，刁蠻搗蛋，簡直就係皇帝仔。初時史嘉麗都俾佢搞到癲，不過慢慢發現佢其實好想有阿爸阿媽關心多啲、傾多啲。所以史嘉麗就帶佢周圍去平時冇得去嘅地方，夜晚就兩個人收埋自己喺被入面玩山洞營火會。慢慢地兩個人建立咗友誼，奎納開始冇咁暴戾，變得好乖好聽話。套戲由真人真事改編，各位父母不妨留心睇，小朋友最需要嘅唔係玩具、唔係學鋼琴，而係你哋嘅聆聽同關心。

■做保姆隨時要有心理準確俾人整蠱露底。

■企喺度接你放學，多謝無聲，一腳就伸埋來。

■做人保姆就等於俾人玩，被水槍射好閒啫。

■小主人目送保姆被炒離開，大放催淚彈。

Bonus：孖導孖作家

今次呢套戲的幕後人員好特別，係由兩個導演一齊拍一齣戲，仲要係兩公婆打孖上，夠少見啦！羅拔普仙尼及雪莉史冰芝貝文兩夫婦都唔係第一次合作拍戲，前一套《AmericanSplendor》就已經獲獎無數，今次拍這齣以家庭為題材的小品就當然得心應手，因為自己都係為人父母，當然了解一個保姆的工作是多麼艱辛。加上原著兩位作者後生時做過5、６年保姆，更能寫實地描述故事。

囗兩位導演正努力地研究劇本。