因受淫照事件影響而避走美國的陳冠希（Edison），於第一張淫照曝光前兩天，和旗下藝人農夫接受本報專訪。Edison為農夫策劃了兩場演出，於4月11及12日在StarHall舉行，據悉Edison更會上台和農夫合唱，雖然現在爆發了淫照事件，但演唱會仍會如期舉行。至於入行6年的Edison，提及曾被迫做過很多自己不喜歡的工作，他強調沒有以前的經歷就沒有今天的他，故此他做了CEO後，對旗下的農夫非常尊重，事事有商有量。 撰文：李珮洳
農夫在商台的支持下，將於4月11和12日於StarHall舉行兩場音樂會，在可容納3,000人的場館傾力演出，成員陸永權（陸永）和鄭詩君（C君）坦言入行多年，從來沒有想過能舉行大型音樂會，陸永說：「Edison有一日打電話同我講，想我哋喺StarHall開騷，我第一個反應係反問佢『3,000人喎，我哋得唔得呀？』之後Edison都俾我兇一兇，就話『係呢？得唔得呢？』跟住佢好肯定講咗一句『冇問題』，老闆都話冇問題，我兩個實冇問題㗎。」
魅力不及農夫
C君透露農夫最多的一場騷有500名觀眾，當知道演出3,000人的騷時竟不懂得反應，他說：「以前做開最多咪500人，聽到做3,000人睇嘅騷我都唔識諗點做。」老闆Edison當然撐他們，並讚農夫的魅力以及所帶動氣氛的能力不是其他歌手擁有的，最簡單的例子就是1月1日叱咤頒獎禮上，農夫得獎時，全場歌手都為他們站起身邊拍手邊唱，將氣氛推至頂點，Edison說：「嗰晚我見到所有歌手為農夫企晒起身又唱又跳呢個場面，我都嚇一嚇，有邊個可以諗到個個歌手都係為佢兩個而企起身，自問我咁多年企喺個台表演都未試過有咁嘅情形。」
歌手得獎，老闆Edison笑言最怕自己的唱片銷量不及農夫，到時他就沒面子了。不過Edison並沒酸溜溜感覺，反而為農夫驕傲，他更自認沒有能力與觀眾溝通，他續說：「你叫我用英文同觀眾講10分鐘？我一定冇問題，但係用廣東話我就真係唔識點講，其實咁多年嚟，我都好想用一句說話叫觀眾睇騷時舉起手企起身，英文我識點同佢哋講，我用咗好多時間去諗中文應該點講呢，諗嚟諗去都覺得『你哋舉高手啦，唔好坐喺度』好鬼奇怪，農夫就從來唔使講呢句說話，就做到呢個效果，呢樣嘢我好服佢哋。」
不擺老闆架子
由一個歌手搖身成為老闆，Edison自問不會擺老細款，與員工之間貴乎尊重和溝通，以前的他被人界定為臭脾氣、少爺仔，但在農夫眼中，Edison絕不是這樣的人，陸永說：「Edison簽咗我哋後，所有事都係有商有量，我哋提出嘅意見，佢一定會聽。聽完之後就會同我哋分析件事嘅可行性、利與弊，如果出嚟效果唔好，佢會講出自己嘅睇法再分析。」
C君又謂Edison教曉他很多舞台上的知識，特別是今次的音樂會，令他更加欣賞這位老闆，他說：「我從來認為做騷就係企上台唱囉，為咗4月嘅音樂會同Edison開咗幾次會，佢令我知道舞台原來係有好多可行性，舞台燈光同聲音都有好多變化，今次佢仲同我哋強調個騷唔係齋唱歌，係要將農夫嘅歷史用一個古仔形式話畀觀眾知。」
嘆以往任支配
聽罷農夫的讚賞後，Edison笑一笑就搶着向記者大讚農夫，他說：「我簽佢兩個係因為佢哋有才華，有好多潛質仲未睇到，我想話畀好多人知，農夫唔係你哋眼中所睇嘅hiphop仔同rapper咁簡單。今年頒獎禮農夫有咁好嘅成績，喺我立場嚟睇已經成功，不過佢哋講過唔覺得自己好叻，呢個只係起步，睇到佢呢個態度我更加開心，因為佢唔同時下嘅𡃁仔，畀着第二啲人有咁嘅成績已經覺得自己好勁，農夫就唔會咁諗，佢知道仲有好多test要過。」
Edison曾說過以往6年的歌手生涯都是「nosay」，並形容以往所做的是奴隸工作，沒有自己主見，一切任人支配，就是因為經歷過這些黑暗日子，他深深明白「己所不欲，勿施於人」這個道理。問Edison是否精挑細選為農夫揀選合適他們的工作？他笑說：「呢樣當然會啦，我都同佢哋講過，如果有個job唔啱佢哋做，但份收入足夠養佢哋兩年，我就會幫佢哋接。其實我都唔想佢哋好似我以前咁，做一啲自己唔鍾意嘅工作，冇之前嗰6年，唔會令我變到有𠵱家嘅諗法，原來做一個藝人最寶貴嘅機會係可以有自己嘅諗法，我幾時都話農夫係最幸福嘅歌手。」
盼Fans企到完場
最後陸永和C君更你一言我一語，興致勃勃談及4月份音樂會的寄望，二人表示希望見到觀眾由開騷企到完騷，他們說：「如果一開騷，啲觀眾好似睇張震嶽咁企晒起身，企到完場就正啦，幾千人一齊舉高手咁就good啦，到時呢個場面真係幾感動㗎。」此時Edison突然爆出一句：「我唔會理你哋㗎，我就坐低㗎啦。」農夫聽罷慢慢吐出：「哦！」一個大字，接着三人哈哈大笑，原來這就是老闆和員工相處之道。
攝影：陳慧安 髮型：MoLui@ii
化妝：PoChan
場地提供：TheContinentalClub（Gateway）
以軟硬為目標
其實Edison對農夫有相當大的期望，他眼中的陸永和C君才華橫溢，所以Edison每次做騷出唱片，都會邀請二人參與其中，繼而簽了他們成為旗下歌手。
等收錢最爽
Edison非常自豪簽了農夫，他更希望有一日可以坐享其成，他說：「我好想有一日農夫可以幫公司賺好多錢，咁我就坐喺公司等收錢，都不知幾爽呀。」Edison有信心農夫將來的成就是第二隊軟硬，他說：「我唔係話佢哋會同軟硬一模一樣，但係佢哋第時做落去嘅成績可以去到嗰個位，我唔係要佢哋一定要去到紅館做騷，總之越來越多人識佢哋已經好好㗎啦。」
